Deputeti i Partisë Socialiste, Erion Braçe, ka reaguar pas publikimit të lajmeve për një përplasje mes tij dhe kryeministrit Edi Rama gjatë mbledhjes së grupit parlamentar socialist.
Ai i cilësoi këto raportime si pjesë të një përpjekjeje për linçim politik dhe mohoi versionin e publikuar për largimin e tij nga mbledhja.
“Kjo është njësoj si teknologjia e vezës, asaj vezës që qëllohen deputetë pa asnjë shkak, pa u ditur as emrin një pjese, por është në të njëjtën linjë, synon vetëm linçimin, ndaj është “vrasje me pagesë” në politikë. Dje para se të nisja të flisja, u kërkova kolegëve të mos nxirrnin përjashta asgjë nga ato që unë do flisja aty. Ja që ndodhi kjo që lexova, madje edhe e transformuar.
Tani meqë dje u mor një angazhim për të bërë shembull njërin ndër ata që nxjerrin fjalët e shtëpisë për të vrarë politikisht atë tjetrin atje matanë, unë mezi pres që të mbahet fjala. Pra të bëhet shembulli. Mua dje nuk më ka nxjerrë askush jashtë, jam ulur sepse nuk kam patur cfarë të them më, e pasi kam thënë aty, e në mbledhjen pararendëse, gjithçka që thonë socialistët prej 1 viti. Kam dalë jashtë vetë sepse nuk kam patur më cfarë të dëgjoja. Kjo është e vërteta”, deklaroi Braçe.
Reagimi i deputetit vjen pas raportimeve për debatet e zhvilluara në mbledhjen e grupit parlamentar të PS-së ditën e djeshme. Gjatë takimit, kryeministri Edi Rama pranoi publikisht se ekziston një distancë mes qeverisjes dhe perceptimit të qytetarëve, duke argumentuar se kjo kërkon një qasje të re në komunikimin me publikun.
Sipas burimeve nga mbledhja, Braçe ngriti shqetësime për mënyrën se si miratohen emërimet në Kuvend. Ai argumentoi se deputetëve u kërkohet të votojnë kandidatura pa pasur më parë informacion të plotë për to, pa diskutim dhe pa u njohur me përvojën apo kriteret e kandidatëve.
Si rast konkret, ai përmendi një emërim në Këshillin Mbikëqyrës të Bankës së Shqipërisë, duke pretenduar se vetëm pas votimit u bë e ditur lidhja familjare mes dy prej personave të zgjedhur nga Kuvendi. Sipas Braçes, e njëjta procedurë ndiqet edhe për emërime në borde dhe komisione të tjera.
Burimet bëjnë të ditur se Rama iu përgjigj fillimisht duke theksuar se përgjegjësinë për këto emërime ua kishte deleguar vetë deputetëve dhe se nuk kishte ndërhyrë në proces. Më pas debati vijoi me tone më të larta, ndërsa kryeministri, sipas të njëjtave burime, i tha Braçes: “Boll se ngelëm duke të përkëdhelur ty.”
Diskutimi u ndërpre pas një pushimi të kërkuar nga kreu i grupit parlamentar, Taulant Balla. Pas rifillimit të mbledhjes, Braçe u largua, ndërsa në reagimin e tij ai këmbëngul se vendimi ishte personal dhe jo pasojë e ndonjë përjashtimi apo ndërhyrjeje.
