Një muaj pas dhunës së ushtruar ndaj pronarit të lokal “Tokyo” në Tiranë, Laert Kasaj, Policia e Tiranës ka arrestuar një prej pronarëve të lokalit “Stockholm”. 31-vjeçari Ferhat Kaja po lëvizte në makinë me ish-kreun e FRPD-së së Kavajës, Kid Kazazi, i shpallur po në kërkim për një atentat të organizuar 3 muaj më parë në Durrës.
Gjatë kontrollit fizik 31-vjeçarit Kaja iu gjet një sasi municioni luftarak, të cilat u sekuestruan bashkë me automjetin e Kid Kazazit. Kaja u vu në pranga, ndërsa vëllai i tij Olti Kaja, 30 vjeç, pasi dyshohet se e dhunuan Kasajn pas dyshimeve të tyre se ai kishte fotografuar biznesin e tyre dhe e denonconte te autoritetet si subjekt që nuk kishte liruar ende hapësirat publike.
Ndërkohë, Kid Kazazi, ish-kryetari i Forumit Rinor të Partisë Demokratike në Kavajë, u arrestua nga policia në Tiranë, pas 3 muajve në arrati. Ai kërkohej për vrasje të mbetur në tentativë. Në pranga përfundoi edhe shoku, i cili e kishte ndihmuar të fshihej.
Kid Kazazi 30 vjeç banues në Kavajë udhëtonte me makinë kur punonjësit e policisë e pikasën në zonën e “Komunës së Parisit” në Tiranë dhe i kërkuan kartën e identitetit. Ai u paraqiti dy dokumente identifikimi, kartë ID dhe leje drejtimi me të dhënat e një personi tjetër, të cilat sipas policisë, dyshohet se janë të falsifikuara.
Kid Kazazi është ndjekur dhe vëzhguar për 3 ditë me radhë nga agjentët e Komisariatit nr. 2, pasi fillimisht u ndalua me ID dhe patentë italiane me emrin Keyan Rama. Policia e Tiranës kërkoi më shumë informacion dhe zbuloi se në fakt, ai ishte i kërkuar për vrasje të mbetur në tentativë 3 muaj më parë, dhe e arrestoi.
Ndaj Kid Kazazit, Gjykata e Durrësit kishte caktuar në mungesë masë arresti në burg për veprën penale vrasje në rrethana cilësuese, mbetur në tentativë dhe armëmbajtje pa leje.
Episodi është shënuar më 30 maj të këtij viti, në Fllakë të Durrësit, kur i riu qëlloi me armë zjarri drejt një automjeti ku udhëtonte një 36-vjeçar dhe 2 të mitur. Nga ngjarja mbeti i plagosur Arbër Goreja i cili u qëllua nga një tjetër automjet në lëvizje. Fatmirësisht të miturit nuk u lënduan. Dyshohet se Kid Kazazi tentoi ta vrasë Arbër Gorenë pasi më herët i kishte goditur me grusht në fytyrë babanë e moshuar, episod që 30-vjeçari nuk ia kishte falur.
I dyshuari Kid Kazazi ka drejtuar Forumin Rinor të Partisë Demokratike në qytetin e Kavajës. Në vitin 2016, atëherë 21 vjeçar ai u plagos pas një konflikti për parkim përpara lokalit të familjes së tij në Kavajë me ish-drejtorin e Zyrës së Punës, i cili qëlloi me armë zjarri.
Njoftimi i policisë:
Shërbimet e Komisariatit të Policisë Nr. 2 në vijim të punës për lokalizimin, kapjen dhe vënien përpara përgjegjësisë penale të shtetasve të shpallur në kërkim, bazuar dhe në informacionet e siguruara në rrugë operative, për vendndodhjen e një shtetasi me rrezikshmëri të lartë shoqërore të shpallur në kërkim për tentativë vrasje, organizuan dhe finalizuan operacionin policor të koduar “Danger”.
Si rezultat i këtij operacioni, në zonën e quajtur “Komuna e Parisit”, është lokalizuar dhe kapur shtetasi K. K., 30 vjeç, banues në Kavajë. Ky shtetas ishte shpallur në kërkim pasi Gjykata e Durrësit i ka caktuar masën e sigurimit personal “Arrest në burg”, për veprën penale “Vrasja në rrethana cilësuese”, mbetur në tentativë dhe “Armëmbajtja pa leje”. 30-vjeçari, me datë 30.05.2025, në Fllakë, për motive të dobëta, ka qëlluar me armë zjarri drejt një automjeti ku udhëtonin 3 shtetas.
Në vijim të operacionit është arrestuar dhe shtetasi F. K., 31 vjeç, i cili ndodhej bashkë me 30-vjeçarin në një automjet. Nga veprimet hetimore ka rezultuar se ky shtetas ka përkrahur dhe ndihmuar 30-vjeçarin të fshihej.
Në momentin e ndalimit 30-vjeçari i ka paraqitur punonjësve të policisë dy dokumente identifikimi(kartë Id dhe leje drejtimi) me të dhënat e një shtetasi tjetër, të dyshuara të falsifikuara. Ndërsa, gjatë kontrollit fizik 31-vjeçarit i gjetën një sasi municioni luftarak.
Shtetasi K. K, iu kalua DVP Durrës për veprime të metejshme.