Naomi Seibt, 25 vjeç, e njohur si “anti-Greta Thunberg” dhe një nga figurat më të njohura të së djathtës ekstreme gjermane, ka kërkuar azil politik në Shtetet e Bashkuara, duke deklaruar se “nuk ndihet e sigurt” në vendin e saj. Lajmi është bërë publik në një intervistë për Fox News, ku Seibt pretendon se po përballet me kërcënime për jetën nga grupe antifashiste dhe se “shërbimet sekrete gjermane e spiunojnë”.
Kërkesa e saj është një rast i rrallë, pasi qytetarët e vendeve të Evropës Perëndimore rrallëherë kërkojnë azil në SHBA, e aq më pak nga Gjermania, një vend me standarde të larta demokratike. Seibt shpreson se administrata e Donald Trump do ta mbështesë kërkesën e saj.
E njohur për qëndrimet kundër teorive të ndryshimeve klimatike dhe për ironizimin e Greta Thunberg, Seibt u bë e famshme që në moshën 19-vjeçare pas një fjalimi në një konferencë të mohuesve të klimës, ku tha se “ndryshimet klimatike janë gënjeshtra të mësuara në shkollë”. Që prej asaj kohe, ajo është konsideruar si simbol i lëvizjes së djathtë kundër “aktivizmit ekologjik”.
Në vitet e fundit, Seibt është afruar me qarqet e ekstremit të djathtë amerikan, përfshirë lëvizjen MAGA të Donald Trump dhe bashkëpunëtorët e Steve Bannon. Ajo ka ndërmjetësuar madje edhe një kontakt mes Elon Musk dhe bashkëkryetares së AfD, Alice Weidel, për një intervistë në platformën X, ku Musk deklaroi mbështetjen e tij për partinë gjermane të ekstremit të djathtë.
Me mbi 450 mijë ndjekës në X dhe mbi 100 mijë abonentë në YouTube, Naomi Seibt tashmë jeton pjesën më të madhe të kohës në SHBA. Analistët e shohin kërkesën e saj për azil si pjesë të një afërsie të re midis së djathtës ekstreme evropiane dhe asaj amerikane, ndërsa vetë Seibt thotë se “dëshiron një Gjermani pa shtet dhe pa ligje”.