Dy etalonë të korrupsionit të qeverisë Berisha, Genc Ruli dhe Ridvan Bode dyshohet se fshihen pas kartelit financiar FED Invest, për të pastruar, qarkulluar dhe shtuar paratë që kanë bërë me aferat korruptive gjatë viteve 2005-2013.
Me qendër te Pazari i Ri në Tiranë, FED Invest dyshohet se përfaqëson pazaret e vjetra dhe të reja të ish pushtetarëve, duke rrjepur fermerët shqiptarë me kredi me interesa të larta, të fshehura dhe që dalin rrugës, thithjen dhe përvetësimin e parave të taksapaguesve evropianë, pastrim të dyshuar parash, rroga jashtë realitetit dhe luks.
Me kapital prej 1 mijë lekësh, Belesh, me emër të ndryshuat më pas në Fed Invest, është kthyer në një perandori të heshtur finaciare, çka ngre dyshime të forta për burimin e parave të investimit fillestar si dhe aktivitetin në vijim.
Karteli finaciar nisi si një kërpudhë në vitin 2002, duke shpërthyer gjatë kohës kur Ridvan Bode ishte kryefinancier i qeverisë Berisha 2005-2013, Genc Ruli ishte ministër i Ekonomisë dhe më pas Bujqësisë 2005-2009 si dhe kur Ardian Fullani ishte Guvernator i Bankës së Shqipërisë. Pra tre figura monumente të abuzimit, afera korruptive dhe pandëshkueshmërisë në Shqipëri.
Më tej, BSH e kthen në një bankë të mirëfillt, duke i dhënë leje për të ushtruar veprimtari financiare të tjera si të gjitha shërbimet e pagesave dhe transferimit te parave, këmbim valutor, qira finaciare dhe sherbime të tjera financiare.
Në letra, pronarët e Fed Invest janë Namik Zeneli, Zana Konini, Hasan Shehu, Mehdi Pepa, Valentin Gocaj, Xhevdet Kapaj dhe Zyjdi Boja.
Personazhet kyç në këtë oktapod financiar janë kryetarja e bordit Zana Konini dhe administratori Perlat Sulaj.
Zana Konini, një lidhje e kamufluar e Genc Rulit dhe Bodes, fillimisht përkthyese i misioneve të Bankës Botërore në Shqipëri, ka qarkulluar dhjetëra milionë euro gjatë tre dekadave të fundit nga fondet ndërkombëtare për bujqësinë.
Pasuria e saj ka një vlerë disa milionë euro, për të cilën do të flasim në vijim.
Perlat Sulaj, CEO i amalgamës financiare, krahu i djathtë i Zana Koninit, është dora që kanalizon fondet nëpër xhepa, duke përfshirë edhe disa kompani të tjera për kamuflim.
Kupola e oktapodit financiar ka paga marramendëse jashtë realitetit shqiptar, madje edhe mbi standardin e Zvicrës. Ka shumë arsye që bujqësia e Shqipërisë është me qesharakja dhe e degraduar në kontinentin Evropian, por Fed Invest mund të jetë një prej tyre.
