Lumir Abdixhiku është rikonfirmuar këtë të enjte si kryetar i Lidhjes Demokratike të Kosovës (LDK), pasi i mbijetoi nismës për shkarkimin e tij në Kuvendin e Jashtëzakonshëm të partisë.
Në punimet e Kuvendit morën pjesë rreth 330 delegatë, të cilët refuzuan kërkesën për largimin e Abdixhikut nga drejtimi i partisë. 170 vota ishin për vazhdimin e tij, 152 kundër dhe pesë abstenime.
Kuvendi u thirr pas zgjedhjeve të 7 qershorit, ku LDK-ja u rendit sërish forca e tretë politike në Kosovë. Delegatët që iniciuan mbledhjen argumentuan se Abdixhiku kishte dështuar në drejtimin e partisë, ndërsa vetë ai i akuzoi nismëtarët për sabotazh.
Abdixhiku drejton LDK-në që nga viti 2021, kur pas dorëheqjes së Isa Mustafës u zgjodh në krye të partisë.
Në zgjedhjet parlamentare të 9 shkurtit 2025, LDK-ja siguroi 18 për qind të votave, por mbeti forca e tretë politike. Në zgjedhjet e parakohshme të 28 dhjetorit rezultati zbriti në 13 për qind. Edhe pse Abdixhiku ofroi dorëheqjen, delegatët e refuzuan atë dhe e konfirmuan në detyrë.
Ndërsa në zgjedhjet e 7 qershorit, LDK-ja mori 16.7 për qind të votave, rezultat që Abdixhiku e cilësoi si sukses. Megjithatë, degët e partisë në Pejë, Lipjan dhe Dega e Dytë në Prishtinë kërkuan largimin e tij. Pas refuzimit të kësaj kërkese, në fillim të korrikut nisi mbledhja e nënshkrimeve për thirrjen e Kuvendit të Jashtëzakonshëm.
Mes figurave më të njohura të LDK-së që dolën hapur kundër Abdixhikut janë deputetët Hykmete Bajrami dhe Avdullah Hoti. Pavarësisht përplasjeve të brendshme, Abdixhiku mbetet në krye të partisë, ndërsa LDK-ja pritet të zhvillojë Kuvendin e saj të rregullt gjatë vitit të ardhshëm.
