Ka kaluar nëpër çdo institucion ku paraja publike rrjedh si lumë dhe ka lënë pas vetëm gjurmë dosjesh penale, por asnjëherë nuk është ndaluar. Gentian Këri, xhambazi i tenderëve, “usta” i pazareve të Ilir Metës dhe i preferuari i Edi Ramës, u rikthye sërish në kupolën e qeverisë disa kohë më parë, por ky emërim kaloi pa bujë, sikur të ishte gjëja më normale që një njeri me pesë dosje penale të vendosej në krye të Sekretariatit të Përgjithshëm të Ministrisë së Financave.
Pas gjashtë muajsh si zv/kryetar i Bashkisë së Tiranës, kryeministri e çoi aty ku i përket sipas logjikës së tij, duke i dhënë në dorë çelësat e arkës së shtetit një njeriu që numëron pesë dosje penale, përfshirë një hetim të SPAK-ut për PPP-në e Sterilizimit. Ky emërim mbart një peshë të qartë, një sinjal që u dërgua për të gjithë ata që ende besojnë se institucionet publike mund të funksionojnë pa mbikëqyrjen e duhur, por sinjali u injorua, u harrua, u mbulua nga zhurma e përditshme e politikës.
Gentian Këri nuk njihet për ndonjë ekspertizë financiare apo integritet administrativ dhe e gjithë karriera e tij, nga shefi i tenderave në Bashkinë e Tiranës kur kryebashkiak ishte vetë Rama, te kryetari i Komisionit të Prokurimit Publik, sekretar i përgjithshëm në Ekonomi e më pas në Infrastrukturë, e deri te zëvendësdrejtori i Fondit Shqiptar të Zhvillimit, ka një vijë të vetme të pandërprerë: vendoset gjithmonë aty ku nënshkruhen kontratat dhe shpërndahen miliardat, dhe gjithmonë, pa përjashtim, pas tij vijnë dosjet.
Tani, ky “esnaf punëmbaruar i lekëve”, siç e quanin në korridoret e qeverisë, u ul në karrigen e Sekretarit të Përgjithshëm të Financave dhe nuk ka pse të habitemi nëse, ashtu siç ka ndodhur në çdo institucion tjetër, ka hyrë edhe në kompetencat e ministrit Petrit Malaj për të mbyllur “pazaret e rënda”, sepse kjo është e vetmja aftësi që i njihet: të finalizojë marrëveshjet dhe të bëjë batërdi me fondet publike.
Por ndërkohë që Gentian Këri u ngjit sërish në shkallët e pushtetit dhe askush nuk foli, një kompani që mban të njëjtin mbiemër, Arkonstudio, kishte fituar gjashtë tenderë nga Fondi Shqiptar i Zhvillimit pikërisht gjatë viteve kur ai ishte kreu i tenderave të këtij institucioni dhe vlera e përgjithshme e ofertave fituese kap shifrën 1.755 miliardë lekë, ose rreth 17 milionë euro.
Kjo kompani zotërohet nga Erjon Këri, i cili, sipas burimeve, është kushëriri i Gentianit dhe në gjashtë vitet e Gentian Kërit në FSHZH, Arkonstudio mori kontratë pas kontrate. Tenderi i konvikteve i gushtit 2019, ku fituesi nuk ishte oferta më e ulët dhe të gjithë konkurrentët e tjerë u skualifikuan; tenderi i qendrave të ekselencës i dhjetorit 2020, ku gjashtë nga tetë konkurrentët u hoqën nga gara; dhe dy marrëveshje kuadër për rigjenerimin urban, të dyja të modifikuara me shtesa prej rreth 20 për qind, pikërisht nën pragun që do të detyronte një tender të ri, duke i sjellë Arkonstudio dhe bashkimeve ku bën pjesë 184.9 milionë lekë shtesë pa asnjë procedurë të re prokurimi.
Në këtë mënyrë, Arkonstudio me Modeste shpk siguruan Rajonin 4, dhe një vit më vonë i njëjti mekanizëm u përsërit për të marrë edhe Rajonin 3 dhe 4 së bashku, një skemë që të kujton më shumë një ndarje tryeze sesa një garë konkurruese. Në kontratën për qendrat e ekselencës, Arkonstudio mori përsipër rinovimin e godinës së vetë Fondit Shqiptar të Zhvillimit, pra kompania e kushëririt të Gentian Kërit u pagua për të ndërtuar selinë e institucionit ku ai drejtonte tenderat, një detaj që flet vetë.
Por historia nuk mbaron me kaq, sepse Arkonstudio është aktualisht në pritje të finalizimit të një leje ndërtimi për një projekt gjigand në Shkozë, “Victoria City”, një kompleks rezidencial me 1,2,4,5,6 dhe 7 kate mbitokë dhe 1,2,3 e 4 kate parkim nëntokë, pra projekti i madh, leja në pritje, dhe si rastësisht, kompania e kushëririt të njeriut që sapo u bë Sekretar i Përgjithshëm i Financave.
Erjon Këri, ortaku i Arkonstudio, ish kandidat për deputet në zgjedhjet parlamentare nën siglën e Partisë Socialiste në Berat, një nga pinjollët e familjës Këri me bazë në Kuçovë, ku anëtarë të saj kanë qenë deputetë, kryetarë bashkie dhe drejtorë të rëndësishëm në Tiranë, socialista “të betuar”, siç do të thoshin në gjuhën e tyre. Erjon Këri si President i federatës së Ping-Pong është shumë i afërt edhe me Fidel Yllin, me të cilin shfaqen së bashku në evente të KOKSH.
Pra, kemi një Sekretar të Përgjithshëm të Financave me pesë dosje penale i cili i ka kaluar vitet duke drejtuar tenderat në institucionet më të pasura të shtetit, ndërsa gjatë kësaj periudhe kompania e kushëririt të tij ka fituar mbi 17 milionë euro kontrata nga pikërisht ai institucion, ka marrë shtesa pa tender dhe tani po pret lejen për një kompleks gjigand në Tiranë, dhe vetë kushëriri, Erjon Këri, u kandidua për deputet i Partisë Socialiste, duke e forcuar edhe më shumë pushtetin e kësaj familjeje në të dyja anët e tryezës: atë të biznesit dhe atë të politikës. Gentian Këri ka ndërruar më shumë institucione sesa dosje ka ndërruar gjykata. /Pamfleti
