Dhjetëra mijëra njerëz janë mbledhur këtë të shtunën në qytetin e dytë më të madh të Serbisë, Novi Sad për të përkujtuar viktimat e shkaktuara nga shembja e strehës së stacionit hekurudhor një vit më parë.
Tubimi përkujtimor nis në orën kur ndodhi tragjedia, me 16 minuta heshtje për 16 viktimat.
Protestat e udhëhequra nga studentët kanë përfshirë kombin ballkanik që nga tragjedia, e cila sipas tyre ishte simbol i korrupsionit. Protestuesit fillimisht kërkuan një hetim transparent për ngjarjen tragjike, por thirrjet e tyre shpejt u përshkallëzuan në kërkesa për zgjedhje të parakohshme.
Studentët, të cilët bënë thirrje për mbledhjen më të madhe përkujtimore të shtunën, por edhe mbështetës të tyre, kanë vërshuar në Novi Sad që nga e premtja.
Protestat e vazhdueshme kanë çuar në dorëheqjen e kryeministrit Vuçeviç, rrëzimin e qeverisë së tij dhe formimin e një qeverie të re, por presidenti nacionalist Aleksandar Vuçiç vazhdon të qëndrojë në detyrë.
Vuçiç i ka etiketuar protestuesit si organizatorë të një grushti shteti të financuar nga jashtë. Në një fjalim televiziv të premten, Vuçiç bëri një gjest të rrallë, duke kërkuar falje që ka bërë deklarata për të cilat, tha se tani i vjen keq.
“Kjo vlen si për studentët ashtu edhe për protestuesit, si dhe për të tjerët me të cilët nuk isha dakord. Kërkoj ndjesë për këtë”- u shpreh presidenti serb ndërsa bëri thirrje për dialog.
Sakaq qeveria serbe e ka shpallur të shtunën ditë zie kombëtare, ndërsa kreu i Kishës Ortodokse Serbe ka organizuar një meshë për viktimat në kishën e Beogradit.
Mbështetësit e Vuçiçit, të cilët që nga marsi kanë ngritur çadra jashtë parlamentit, njoftuan se do të nderojnë viktimat para kishës.
“Në këtë përvjetor të trishtuar, u bëjmë thirrje të gjithëve të veprojnë me përmbajtje, të ulin tensionet dhe të shmangin dhunën”- tha delegacioni i Bashkimit Evropian në Serbi. Protestat kanë mbetur kryesisht paqësore, por në mesin e gushtit ato degjeneruan në dhunë.
Në shtator, 13 persona, përfshirë ish-ministrin e ndërtimit Goran Vesiç, u akuzuan penalisht për ngjarjen në Novi Sad.
Ndërkohë një hetim i veçantë antikorrupsion vazhdon së bashku me një hetim të mbështetur nga BE-ja për keqpërdorimin e mundshëm të fondeve të Brukselit në atë projekt.
