Partia Demokratike i ka dalë në mbrojtje kandidatit të pavarur për Tiranën, Florjan Binaj, për të cilin ka shprehur mbështetje të plotë.
Edi Paloka thotë se Binaj të paktën i ka bërë shqiptarët për të qeshur, kurse Rama për të qarë.
“Ashtu sic pritej, Rama komentoi sot kandidaturen e Florjan Binajt duke u shprehur me ironi se opozita “zgjodhi nje aktor humori… qe ben per te qeshur…”
Binaj eshte vertet aktor humori dhe i ben njerzit per te qeshur, po ne jemi te vetmit ne bote qe kemi ne krye nje lolo, nje klloun, qe prej 13 vitesh nuk ben per te qeshur, po per te qare shqiptaret”, shkruan Paloka.
Në podkastin e kësaj të diele, Edi Rama nuk e ka kursyer ironinë për kundërshtarët, duke thënë se opozita do të humbë sërish në garën për Bashkinë e Tiranës, sepse socialistët kanë kandidaten më të mirë, Ogerta Manastirliun.
“[…] kundërshtarët përfaqësojnë shëmbëlltyrën më kuptimplote të humbjes së radhës, të ndjesë pastë Partia Demokratike”, është shprehur kryeministri, ndërsa është treguar më realist për kandidatin e pavarur Florjan Binaj, i cili ka gjetur mbështetje nga PD dhe faktori i gjerë opozitar.
Sipas Edi Ramës, ai është aktor dhe aktorët me role jetojnë ndaj nuk meriton të gjykohet. Kreu i socialistëve ka kujtuar se dikur, në një mbledhje të Kongresit të PS, Florjan Binaj ishte ftuar të bënte sallën për të qeshur duke imituar vet Edi Ramën.