Përmbushja e detyrimeve në bisedimet për anëtarësim në Bashkimin Evropian dhe objektivi që negociata të mbyllen brenda 2027-ës, ka bërë që Ministria e Drejtësisë të propozojë ndryshime ligjore urgjente në Kodin Penal, me qëllim përafrimin me legjislacionin e Brukselit, në fushat e pastrimit të parave, luftën ndaj terrorizmit, trafikut të drogave, trafikimit të qenieve njerëzore dhe mbrojtjes së viktimave të tij, abuzimit seksual dhe shfrytëzimit seksual të fëmijëve dhe pornografisë së fëmijëve.
E re është një dispozitë mbi kriminalizimin e mashtrimit që ndikon në interesat financiare të BE-së. Përmes nenit të shtuar Neni 143/a/8 përdorimi ose paraqitja e deklaratave ose dokumenteve të rreme, të pasakta ose të paplota që ka si efekt përvetësimin ose mbajtjen e padrejtë të fondeve nga buxheti i përgjithshëm i Bashkimit Evropian dënohet me burgim gjer në 5 vjet. Kur kjo vepër bëhet në bashkëpunim burgimi është nga dy gjer në gjashtë vjet. Nëse shifra e abuzimit i tejkalon 50.000 euro, dënohen me burgim nga pesë deri në dhjetë vjet.”.
Një nga ndryshimet më të rëndësishme në paketën e re ligjore prek nenin 234/a, që lidhet me pjesëmarrjen në organizata terroriste. Sipas propozimit, çdo person që merr pjesë, ndihmon me financime, informacion apo dokumente të falsifikuara në aktivitetet e një organizate terroriste, rrezikon dënim jo më pak se 15 vjet burg, ndërsa aktualisht dënimi është minimialisht 7 vjet dhe maksimalisht 15.
Për korrupsionin, vijnë një sërë nenesh të reja që synojnë të ndëshkojnë si korrupsionin aktiv, ashtu edhe atë pasiv të nëpunësve dhe funksionarëve të lartë të BE-së. Për këtë kategori, parashikohen dënime nga 6 muaj deri në 3 vjet burg, ndërsa kur korrupsioni ushtrohet ndaj anëtarëve të Komisionit ose Parlamentit Evropian, dënimi mund të shkojë deri në 5 vjet burgim. Për korrupsionin pasiv, masat janë edhe më të rënda, nga 2 deri në 8 vjet burg për nëpunësit, dhe nga 4 deri në 12 vjet për funksionarët e lartë. E njëjta logjikë ndëshkuese zbatohet edhe për gjyqtarët e Gjykatës së Drejtësisë së BE-së dhe Gjykatës Evropiane të Auditorëve, për të cilët parashikohen dënime nga 1 deri në 10 vjet burg, në varësi të formës së korrupsionit. Këto nene do të hynin në fuqi me anëtarësimin e Shqipërisë në BE.
Ndryshime të forta parashikohen edhe për trafikun e drogës në sasi të mëdha, ku autorët do të përballen me 7 deri në 15 vjet burg, i cili nuk ndryshon në dënim, por zgjerohet fusha e ofrimit, ndërmjetësimit apo dërgimi në transit të drogës. Po ashtu, për pastrimin e parave, autoritetet do të kenë mundësi të veprojnë edhe pa qenë e nevojshme të përcaktohet me saktësi origjina ose autori i krimit, duke zgjeruar ndjeshëm fushën e hetimit.
Dënime më të ashpra parashikohen edhe për krimet seksuale. Abuzimi me të mitur poshtë moshës 14 vjeç dënohet deri tani nga 7 deri në 15 vjet burg, ndërsa me ndryshimet e reja bëhet 10 deri në 20 vjet burg. Ndërkohë nuk ndryshon dënimi 5 deri në 15 vjet për moshën nga 14 deri në 18 vjeç. Ndërkohë shtohet edhe një nën nen tjetër për organizim të udhëtimeve për qëllime seksuale, përkundrejt shpërblimit apo jo, dënohet me burgim nga dy deri në gjashtë vjet.
Pasuritë që lidhen me interesat financiare të BE-së do të trajtohen me ligje të posaçme evropiane, ndërsa disa prej dispozitave të reja do të hyjnë në fuqi vetëm pas ratifikimit të Konventës Evropiane kundër korrupsionit, që përfshin edhe zyrtarët e BE-së.
Sipas Ministrisë së Drejtësisë, këto ndryshime synojnë forcimin e shtetit ligjor dhe përafrimin me standardet e Bashkimit Evropian, si pjesë e procesit të integrimit evropian të Shqipërisë. Në thelb, ato pritet të ndikojnë ndjeshëm në luftën kundër korrupsionit, terrorizmit dhe krimit të organizuar.
