Një seri sulmesh ajrore ka shkaktuar vdekjen e të paktën 32 personave në Gaza, sipas raportimeve të stafit mjekësor më 14 shtator. Mes viktimave ndodhen edhe 12 fëmijë, të cilët u dërguan në spitalin Shifa.
Një nga sulmet, kryer gjatë natës dhe në orët e para të mëngjesit, goditi një shtëpi në lagjen Sheik Radvan, duke vrarë një familje prej 10 personash, përfshirë një nënë me tre fëmijët e saj, sipas autoriteteve shëndetësore.
Po ashtu, Asociacioni Palestinez i Futbollit njoftoi se lojtari i klubit Al-Helal, Mohammed Ramez Sultan, u vra gjatë sulmeve së bashku me 14 anëtarë të familjes së tij.
Ushtria izraelite ende nuk ka komentuar lidhur me këto sulme.
Ditëve të fundit, Izraeli ka intensifikuar sulmet ajrore në Qytetin e Gazës, duke shkatërruar ndërtesa shumëkatëshe dhe duke akuzuar Hamasin – e shpallur organizatë terroriste nga SHBA-të dhe Bashkimi Evropian – për vendosjen e pajisjeve të vëzhgimit në këto ndërtesa.
Izraeli ka deklaruar se synon të marrë kontrollin e plotë të qytetit të Gazës, zonës më të madhe urbane në Rripin e Gazës, ku sipas OKB-së jetojnë rreth 1 milion persona dhe ku është shpallur gjendje e urisë. Një ditë më parë, ushtria izraelite tha se kishte goditur një ndërtesë shumëkatëshe që, sipas saj, përdorej nga Hamasi.
Banorëve të Qytetit të Gazës u është kërkuar të largohen për shkak të ofensivës ushtarake.
Lufta në Gazë nisi më 7 tetor 2023, kur Hamasi sulmoi jugun e Izraelit, duke vrarë rreth 1.200 persona dhe duke rrëmbyer 251 të tjerë. Si pasojë e ofensivës hakmarrëse izraelite, në Gazë kanë humbur jetën mbi 64.000 palestinezë, sipas Ministrisë së Shëndetësisë në Gazë – një shifër e cilësuar si e besueshme nga OKB-ja./REL