Nepali ka vendosur te heqë bllokimin e mediave sociale, pas protestave që shpërthyen në vend, duke lënë të paktën 19 persona të vdekur dhe mbi 100 të plagosur.
Para ndalimit, një fushatë në rrjetet sociale, e njohur si “nepo kid”, kishte bërë jehonë, duke nxjerrë në pah jetesën luksoze të fëmijëve të politikanëve dhe akuzat për korrupsion. Kur qeveria urdhëroi bllokimin e 26 platformave, përfshirë Facebook dhe YouTube, mijëra të rinj dolën në rrugë dhe sulmuan parlamentin në kryeqytetin Kathmandu të hënën. Disa rajone mbeten nën orë policore.
Një ministër qeveritar tha se bllokimi u hoq pas një mbledhjeje emergjente vonë të hënën natën për të “adresuar kërkesat e Gjeneratës Z”. Qeveria kishte justifikuar fillimisht masën si një mënyrë për të luftuar lajmet e rreme, gjuhën e urrejtjes dhe mashtrimet online.
Të rinjtë që protestuan thanë se qëllimi i tyre ishte gjithashtu kundër sjelljes autoritare të qeverisë. Disa mbajtën pankarta me parulla si “Mjaft është mjaft” dhe “Fund korrupsionit”. Disa protestues hodhën gurë drejt shtëpisë së Kryeministrit KP Sharma Oli në qytetin e tij Damak.
Kryeministri Oli shprehu keqardhje për dhunën dhe viktimat, duke fajësuar “infiltrimin e grupeve me interesa të ndryshme”. Ai njoftoi gjithashtu krijimin e një paneli hetimor dhe ofrimin e ndihmës financiare për familjet e viktimave dhe trajtim të lirë për të plagosurit.
Ministri i Brendshëm Ramesh Lekhak dha dorëheqjen të hënën pas kritikave të ashpra për përdorimin e forcës gjatë protestave.