Presidenti i SHBA-ve Donald Trump ka deklaruar se nuk e ka diskutuar kurrë planin e Mbretërisë së Bashkuar për të njohur shtetësinë palestineze me kryeministrin britanik Keir Starmer, duke shtuar se SHBA-të “nuk janë në atë kamp”.
Presidenti, duke u kthyer në Uashington pas vizitës në Skoci gjatë fundjavës, tha se deklarata e Starmer ishte e ngjashme me atë të Emmanuel Macron të Francës.
“Ai në thelb po thotë të njëjtën gjë si Macron dhe kjo është në rregull. Nuk do të thotë që unë duhet të pajtohem”, tha ai.
Trump tha gjithashtu se administrata e tij do të merret me Izraelin për krijimin e qendrave ushqimore në Gaza.
“Mendoj se Izraeli dëshiron ta bëjë këtë, në fakt”, thotë ai. “Mund t’ju them se ata duan ta bëjnë, nuk duan që Hamasi të vjedhë paratë ose ushqimin. Nëse e bëjnë dhe me të vërtetë duan ta bëjnë, do të bëjnë një punë të mirë.”
