Presidenti i Shteteve të Bashkuara, Donald Trump, ka nisur një vizitë katërditore në Skoci, duke u ndalur fillimisht në resortin e tij në Turnberry. Pas uljes së Air Force One në aeroportin Prestwick, pak para orës 20:30 të së premtes, Trump u prit nga Sekretari Shtetëror për Skocinë, Ian Murray, dhe ambasadori amerikan në Mbretërinë e Bashkuar, Warren Stephens.
“Është fantastike të jem në Skoci”, tha Trump për gazetarët në aeroport, përpara se të nisej drejt Turnberry, ku pritet të kalojë fundjavën dhe të luajë golf. Eskorta presidenciale, e shoqëruar nga dhjetëra automjete policie dhe ekipe mjekësore, hyri në resort rreth orës 21:30, ndërsa përgjatë rrugës u panë edhe disa protestues.
Në fjalën e tij, Trump vlerësoi Kryeministrin britanik Keir Starmer, me të cilin do të takohet të hënën.
“Më pëlqen kryeministri juaj. Është pak më liberal se unë, por është njeri i mirë dhe e ka bërë një marrëveshje të mirë tregtare për Britaninë,” tha ai, duke iu referuar një marrëveshjeje që sipas tij ishte vonuar për 12 vjet.
Trump përmendi gjithashtu se do të takohet edhe me Kryeministrin e Skocisë, John Swinney, të cilin e quajti “njeri të mirë”. Swinney ka paralajmëruar se në këtë takim do të përfaqësojë interesat e Skocisë dhe do të diskutojë çështje si tregtia dhe investimet amerikane në rajon.
Edhe presidentja e Komisionit Evropian, Ursula von der Leyen, ka konfirmuar përmes rrjetit social X se do të zhvillojë një takim me presidentin amerikan të dielën për të diskutuar marrëdhëniet tregtare ndëratlantike.
Pas fundjavës në Turnberry, Trump pritet të udhëtojë drejt Aberdeenshire për të inauguruar një fushë të re golfi në pronën e tij në Menie. Ai tha se projekti nuk do të ishte realizuar pa ndihmën e aktorit të ndjerë Sean Connery, të cilin e falënderoi për mbështetjen në marrjen e lejeve.
Vizita e Trump në Skoci shoqërohet me masa të rrepta sigurie. Zona përreth Turnberry është e rrethuar me gardh mbrojtës, janë ngritur pika kontrolli dhe janë mbyllur disa rrugë. Forca policore janë shtuar me efektivë nga rajone të tjera të Britanisë, përmes ndihmës së ndërsjellë mes forcave të rendit. Edhe në Aberdeenshire, pranë pronës në Menie, janë parë një numër i madh automjetesh policore.
Ndërkohë, janë paralajmëruar edhe protesta në qytete si Edinburgh dhe Aberdeen. Kryeministri Swinney u ka bërë thirrje protestuesve që të shprehin qëndrimet e tyre në mënyrë paqësore dhe ligjore.
Gjatë fjalës me gazetarët, Trump nuk i kurseu kritikat ndaj Evropës për çështje të energjisë dhe emigracionit.
“Ndaloni mullinjtë me erë. Po i shkatërroni vendet tuaja. E them me të vërtetë, është shumë e trishtueshme”, tha ai.
Ai pretendoi se emigracioni i paligjshëm është “një pushtim” që po “vret Europën”.
Presidenti amerikan hodhi poshtë gjithashtu interesin e mediave për dosjen Epstein dhe intervistën e Ghislaine Maxwell, duke thënë se “nuk është momenti për të folur për falje” dhe se “mediat po e fryjnë këtë çështje pa arsye”.
Vizita e tij shihet si përgatitje për vizitën shtetërore të planifikuar për muajin shtator, ku do të pritet zyrtarisht nga Mbreti Charles në Kështjellën Windsor.
Trump ka lidhje familjare me Skocinë, pasi nëna e tij, Mary Anne MacLeod, ishte me origjinë nga Ishujt e Jashtëm Hebride dhe u shpërngul në SHBA gjatë krizës së Madhe Ekonomike. Ai ka vizituar më parë Skocinë si president në vitin 2018 dhe më pas në vitin 2023.