“Një takim mortor” e konsideroi kryetari i Partisë Demokratike, Sali Berisha, aktivitetin e Partisë Socialiste pasditen e së hënës në Pallatin e Brigadave për të festuar fitoren e mandatit të 4 në zgjedhjet e 11 Majit.
Në një konferencë shtypi nga selia blu, kryedemokrati Berisha hodhi akuza duke thënë se Edi Rama mblodhi në takim narkodeputetë dhe përfaqësues të botës së krimit.
“Dje pasdite, siç e panë shqiptarët, u zhvillua para syve të tyre, një takim në të gjithë përmasat e tij, tiparen dhe frymën, sikur Toto Rina takonte bashkëpunëtorët e tij. Ky takim, në të cilin nga analiza e fytyrave, ju nuk do gjeni dot asnjë buzëqeshje, asnjë lëvizje koke, asnjë reagim, sikur të ishte një takim mortor, dhe i tillë ishte festa e farsës elektorale.
Ky takim me narkodeputetët e tij, me përfaqësuesit e bandave më të rrezikshme të Shqipërisë, rajonit dhe Europës, karteleve të drogës, kartelit Troplini, Arkend Ballën, Ani Dyrmishin, Drazhin, etj, Sara Milen dhe grupin e kartelit të Elbasanit, përfaqësuesit e Shytëve, Julianit të Pashakos, Renato Salihit dhe Arben Qimes, përkatësisht Klosi, tezaku apo jotezaku, kush i merr vesh ato, i Belindës, Klodian Jahja, Koreshi dhe përfaqësues të tjerë të Bajrëve, të Tukut, përkatësisht Shkodër dhe Lezhë, Tërmet Peqëve dhe shumë përfaqësuesve të tjerë të botës së krimit.
Në këtë takim, Edi Rama u tha shqiptarëve se kërbaçi i tij është SPAK. Lëvizët, po deshët, u tha atyre, ja ku e keni SPAK që është në duart e mia, duke e ditur se ata janë një seri përfaqësuesish të krimit.
Ai SPAK-un nuk ua tregoi vetëm atyre, por padronëve të tyre të vërtetë që i nxorën në lista.
Edhe Enver Hoxha një takim të tillë kërcënues vështirë se do ta arrinte. Ai foli për Altinin, njëlloj si Enveri për Arianitin. Pra, shqiptarët mësuan se farsa elektorale prodhoi një narkoparlament, i cili nisi ditën mbledhjen pa hyrë akoma në sallë, duke vishkulluar me SPAK si kamxhik të tij”.
Zgjedhjet e 11 Majit, të cilat Sali Berisha i quan farsë elektorale, sipas tij prodhuan një “narkoparlament”.
Farsa elektorale, sikundër Berisha e quan, tha se nuk do t’i falet kurrë Edi Ramës.
“Për sa u përket etiketave që përdori Edi Rama, unë i them kaq, që e ka futur vendin në një fazë të re si kurrë më parë në 32 vite. Dhe e garantoj se mijëra, mijëra shqiptarë, që e kanë tashmë të qartë se kanë tek Edi Rama armikun e betuar të votës së lirë, nuk do ia falin atij kurrë këtë farsë elektorale”.