Blendi Klosi, drejtuesi politik i Partisë Socialiste në Dibër, i tha kryeministrit Edi Rama se dibranët i janë shumë mirënjohës pasi për ta është pushtetari që u ka mbajtur më shumë fjalën.
“Të janë mirënjohës se ti e mbajte fjalën dhe për dibranët je pushtetari më fjalëmbajtur. Atë që thua, atë e bën. Nuk thua asgjë nga ato që nuk i bën dot. Prandaj ne kemi besim se me Edi Ramën dhe PS do të hyjmë në Europë. Se Edi Rama e ka thënë dhe dibranët e besojnë që ajo do të ndodhë”, tha Klosi.
Madje Klosi, i cili është gjithashtu Sekretari Përgjithshëm i selisë rozë, mendon se vota e parë që ka ardhur nga diaspora i takon Partisë Socialiste. Këtë ai e sheh si rastësi që ka ndodhur disa herë radhazi, pasi edhe fushata e PS nisi me vallen e Dibrës, ndërsa vota e parë për diasporën i shkoi një qytetari dibran.
“Edi Rama, mbase ka pasur një rastësi, por janë disa rastësi rresht. Ne me vallen e Dibrës hapëm fushatën elektorale të Shqipërisë. Vota e parë erdhi në Dibër. Patronazhisti jonë tha që kjo votë i takon së majtës, ne, dhe prandaj kemi besim që vota e parë në 1 milionë vota që do marrë PS më 11 Maj erdhi prapë nga Dibra. Ishte punë e madhe e gjithë strukturave tona që ishim qarqet e para për regjistrime nga diaspora. Bënë një punë të madhe të gjithë strukturat, por sidomos gratë”, tha Klosi.
Madje gratë e Qarkut Dibër në kor treguan se çfarë rezultati presin socialistët nga 11 Maji.
“4 me 1 s’ka bërë vaki, nga Burreli n’Peshkopi”, thanë ato.