Ministri i Jashtëm i Iranit refuzoi propozimet e Shteteve të Bashkuara për negociata të drejtpërdrejta mbi ambiciet bërthamore të Teheranit, disa ditë pasi presidenti amerikan Donald Trump bëri thirrje për bisedime sy më sy.
Në një deklaratë të lëshuar më 6 prill nga Ministria e Punëve të Jashtme, Abbas Araghchi tha se Teherani ishte i gatshëm të mbante bisedime indirekte me Uashingtonin.
“Irani e mban veten të përgatitur për të gjitha ngjarjet e mundshme apo të pritshme dhe, ashtu siç është serioz në diplomaci dhe negociata, do të jetë po aq vendimtar dhe serioz në mbrojtjen e interesave dhe sovranitetit të tij kombëtar”, u citua të ketë thënë ai.
Komentet e Araghchit erdhën tre ditë pasi Trump bëri thirrje për “bisedime të drejtpërdrejta” me Teheranin, duke thënë se ato ishin “më të shpejta” dhe ofronin një kuptim më të mirë sesa përdorimi i ndërmjetësve.
Muajin e kaluar, Trump i dërgoi një letër liderit suprem iranian, Ajatollah Ali Khamenei, duke kërkuar negociata dhe duke e paralajmëruar për veprim ushtarak nëse diplomacia do të dështonte.
Ndërkohë, presidenti iranian, Masud Pezeshkian, deklaroi më 5 prill se Teherani ishte i gatshëm të angazhohej në dialog, por nëse palët do të ishin të barabarta.
Në vitin 2015, Irani arriti një marrëveshje historike me Shtetet e Bashkuara, Francën, Kinën, Rusinë dhe Britaninë, si dhe Gjermaninë, për të kufizuar aktivitetet e tij bërthamore.
Marrëveshja e vitit 2015 lehtësoi sanksionet e rënda që kishin kufizuar ekonominë e Iranit.
Megjithatë, gjatë mandatit të parë të Trumpit, Shtetet e Bashkuara u tërhoqën nga marrëveshja dhe rivendosën sanksione.
Irani mohon akuzat perëndimore se po përpiqet të krijojë armë bërthamore, duke këmbëngulur se programet e tij kanë qëllime thjesht civile, sikurse prodhimi i energjisë elektrike./REL