Europa ka nevojë të jetë më e bashkuar, tha të premten ish-presidenti i Parlamentit Europian, Martin Schulz, në përgjigje të pikëpyetjeve që po i ngre Amerika kontinentit të vjetër.
Laureati i çmimit “Karlspreis – Karli i Madh” në vitin 2015 e bëri deklaratën nga Tirana, gjatë ceremonisë së ndarjes së këtij çmimi ndërkombëtar.
Me çmimin “Karlspreis” nderohen personalitetet me kontribute në bashkimin dhe përparimin e Europës, kontinenti që tani përballet me dilema ekzistenciale, nga konkurrenca te gjeopolitika.
“Europa gjatë dhjetëvjeçarëve të fundit ka qenë e sigurt. Qeveria e Shteteve të Bashkuara të Amerikës, në veçanti presidenti [Donald Trump] dhe zv.presidenti i saj [J.D. Vance], për mendimin tim, për arsye shumë ideologjike, po vënë në pikëpyetje parimet kryesore të botës perëndimore. Këto vlera bazohen mbi tri aspekte: respekti, toleranca dhe dinjiteti – respekt për cilindo individ në shoqëri; tolerancën për të toleruar gjithë mendimet dhe besimet e tjera; dhe gërshetimi i respektit individual dhe i pranimit të tolerancës sjellin dinjitetin, që ti ua jep të tjerëve. Kjo është baza e një njeriu me mendje të hapur, i cili ekziston në një vend demokratik, heterogjen, shumëkulturor dhe shumëfetar.
Ajo me të cilën ne po përballemi tashmë është që qendra e pushtetit, e një prej demokracive më të mëdha në botë, ai person [Trump], po sillet në një mënyrë të tillë që po e bën model sjelljen pa respekt dhe mungesën e tolerancës dhe sjelljen pa dinjitet në përvojën e përditshme. Shpresoj që europianët më në fund do të kuptojnë se sfidën mund ta zgjidhnin duke qenë bashkë. Duke qenë të bashkuar unë mendoj që z. Trump po kontribuon kundrejt asaj gjëje që kam kërkuar gjatë gjithë jetës sime politike, një Europë të bashkuar e më të fortë që shkon përtej kombit-shtet,” deklaroi presidenti i Fondacionit Friedrich Ebert.
Në panelin e ndarë me kryeministrin Edi Rama foli edhe Jurgen Linden, kryetari i bordit drejtues të Çmimit “Karlspreis”. Ai foli për përçarjet e reja dhe të vjetra në sfondin gjeopolitik të Europës.
“Deri më sot Europa ka pasur mbrojtjen e SHBA-së, që ka ruajtur një rol shumë të rëndësishëm edhe në nivelin ekonomik, por Europa vetë nuk ka qenë partnere në politikat globale ku do të donim të ishim. Ne kemi agresorë jo vetëm nga jashtë, por edhe nga brenda,” deklaroi z. Linden.
Diskutimit iu bashkua edhe aktivistja politike për mbrojtjen e të drejtave të grave, Veronica Tsepkalo. Ajo dhe bashkëshorti i saj, ish-kandidati për president i Bjellorusisë, Valery Tsepkalo, janë përndjekur politikisht dhe mbi ta rëndojnë dënime në mungesë deri 17 vjet burg për shkak se tentuan të garojnë kundër kreut aktual të shtetit, Aleksandër Lukashenko.
Znj. Tsepkalo e përshkroi vendin e saj si një vend autoritar, diktatura e fundit në Europë para nisjes së luftës në Ukrainë.
“Presidenti ynë ka qenë në pushtet prej më shumë se 30 vjetësh. Nuk ka pasur ndryshime të pushtetit, parlament, diskutime të hapura. Për 30 vjet na është ndaluar çdo gjë që është normale për një vend demokratik.
Sigurisht, kur ke një superfuqi si Rusia që të mbështet, kur ke para që derdhen vetëm për të luftuar, njerëz që nuk kanë as armë, vetëm lule. Ne ishim gra me lule, visheshim me të bardha. Ndjenjë e jashtëzakonshme solidariteti midis grave sepse donim të tregonim se mund t’i fitonim zgjedhjet pas asnjë pikë të vetme gjaku. Sigurisht z. [Vladimir] Putin, Lukashenko na luftoi. Vendi ynë nuk kishte parë një reprezalje të tillë prej 30 vitesh. Patëm 15 mijë të burgosur politikë. Në rastin tonë, kundërshtarët politikë vazhdojnë të jenë në burg. Humbëm çdo gjë që kishim në vendin tonë, shtëpinë, apartamentin. Lukashenko shiti në ankand edhe lodrat e fëmijëve tanë. Unë jam e dënuar me 12 vite në mungesë, ndërkohë që bashkëshorti im që është këtu është dënuar me 17 vite në mungesë,” tregoi znj. Tsepkalo.