I ftuar në emisionin “People”, në Euronews Albania, avokati Spartak Ngjela analizoi arsyet e vendimit të Gjykatës së Lartë, e cila la në burg ish-presidentin Ilir Meta.
Sipas tij, SPAK ka ngritur akuza të rënda ndaj Metës, të cilat, sipas dispozitave ligjore, kërkojnë domosdoshmërisht masën e arrestit, duke përjashtuar masa më të lehta.
Ngjela theksoi se opozitarët nuk mund të ndikojnë në punën e SPAK-ut, pasi kanë vetëm fjalë, ndërsa situata ndryshon me kryeministrin, i cili ka shumicën parlamentare.
“Meta nuk akuzohet lehtë, akuzat janë të rënda sepse përfshijnë para dhe shpërdorim detyre. Ligji parashikon raste ku arrestimi është i detyrueshëm dhe raste ku ai nuk është i domosdoshëm. Në rastin e Metës, arresti është i pashmangshëm sipas dispozitave ligjore. Në thelb, arresti shtëpiak dhe ai në burg kanë të njëjtin efekt, pasi të dyja janë masa kufizuese,” – u shpreh Ngjela.
Duke iu referuar akuzave për shpërdorim detyre dhe përfitime financiare, ai tha: “Këtu bëhet fjalë për atë që ka pasur paratë. Sipas akuzës, Meta ka shpërdoruar postin e tij për përfitime financiare. Arsyeja kryesore e arrestimit është të parandalojë fshehjen e provave dhe mundësinë e arratisjes.”
Ngjela gjithashtu komentoi se Meta nuk u bë president falë forcës së partisë së tij, por falë aleancave politike, pasi sipas tij, dy forcat kryesore në vend mbeten socialistët dhe demokratët.
Në lidhje me ndikimin politik në sistemin e drejtësisë, ai tha se është e pritshme që kushdo që arrestohet të kritikojë procesin.
“Përderisa opozita nuk ka ushtri, nuk mund t’i bëjë presion SPAK-ut, sepse nuk ka forcë, ka vetëm fjalë. Ndërsa kryeministri është në një pozicion ndryshe, pasi ai ka shumicën parlamentare dhe mund të shkaktojë trazira politike,” – përfundoi Ngjela.