Një 30-vjeçar shqiptar, Edison Pula, ka rënë në prangat e Policisë, pasi ishte shpallur në kërkim për një sërë veprash penale.
I shpallur në kërkim nga Shqipëria dhe i dënuar me 14 vite burg, ai është vënë në pranga në Luksemburgut dhe pritet të ekstradohet në vendin tonë.
30 vjeç i lindur në Krujë është dënuar me 14 vjet burgim, për veprat penale “Vrasja me paramendim”, “Shkatërrimi i pronës me eksploziv”, “Vjedhja me dhunë”, “Mbajtja pa leje dhe prodhimi i armëve, armëve shpërthyese dhe i municionit”, “Vjedhja” dhe “Largimi i të burgosurit nga vendi i qëndrimit”.
Edison Pula, njihet si njeriu që në Shqipëri hodhi në erë karrierën dy policëve mbasi u arratis në çastet që ata po e fusnin në burg. Po ashtu ai është arratisur edhe nga një burg në Itali.
Nga burgu i Trevizos, u largua së bashku me dy shqiptarë të tjerë, këta të fundit të arrestuar brenda pak orësh.
Por më shumë se sa episodet e vjedhjeve në Itali dhe Shqipëri dhe implikimi në drogë, emri i të arratisurit Edison Pula lidhet me një nga atentatet me tritol të organizuar ndaj njerëzve të hetuar për vjedhjen e një mjeti që u përdor për vrasjen e kryekomisar Ditan Lamaj.
Numri i telefonit që aktivizoi bombën me tritol në 19 shtator 2016 në automjet Gentjan Bejtjes i dëmtuar rëndë në atë kohë, e tradhtoi Elidon Pulën dhe bashkëpunëtorët e tij.
Krimet e renda e hetuan në atë kohë shënjestrën e atentatit të Pulës, Gentjan Bejtja, së bashku me Enver Stafukën, si hajdutët që siguruan makinën “BMË” prej nga ku u qëllua me breshëri Dritan Lamaj, Dëshmor i Atdheut.
Gazetarja e Top Channel Anila Hoxha ka raportuar më herët se për atentatin që synoi të asgjësonte një person që ka dijeni për autorët e vrasjes së një polici si Lamaj, prokuroria mori nën hetim jo vetëm Edison Pulaj por edhe Oltion Cacën, që të dy nën akuzë për vrasje me paramendim të mbetur në tentativë dhe shpërthim me eksploziv.
Ky hetim së bashku me vendimet e fajësisë është rekursuar në Gjykatën e lartë, së bashku me episode të tjera për të cilat i arratisuri akuzohet në Shqipëri si vjedhje dhe drogë.
Në Krujë, dy ditë mbasi ai u morr i pandehur dhjetorin e vitit 2016, Edison Pula u shpëtoi nga duart dy policëve Denis Çela dhe Naim Stafuka duke u arratisur. Policët që u arrestuan për shpërdorim detyre thane se sapo e zbritën nga makina për ta futur në komisariat, i dyshuari përfitoi nga dera e hapur dhe u largua.