Shqiptarët mund të konsiderohen me fat që kanë aleat strategjik një superfuqi ushtarake si SHBA. Se cila është fuqia ushtarake e SHBA-së në praktikë, provën e dhanë bombardimet e vitit 1999 mbi ish-Jugosllavi, ku nuk zbriti asnjë ushtar në terren dhe brenda një muaji regjimi i Milosheviçit kapitulloi pa kushte.
Shpenzimet për mbrojtjen nga Shtetet e Bashkuara përbënin gati 40 për qind të shpenzimeve ushtarake krahasuar me të gjitha vendet e tjera në mbarë botën, në vitin 2022, sipas shifrave të publikuara së fundmi nga Instituti Ndërkombëtar i Kërkimeve për Paqen në Stokholm (SIPRI).
Shpenzimet e mbrojtjes amerikane u rritën me 71 miliardë dollarë nga viti 2021 deri në vitin 2022. Një pjesë e shpenzimeve u rritën për shkak të një ndihme ushtarake të dërguar për të mbështetur Ukrainën në konfliktin e saj me Rusinë. Aktualisht, Shtetet e Bashkuara shpenzojnë më shumë për mbrojtjen sesa 10 vendet e tjera të mëdha të marra së bashku, të cilat kanë edhe buxhetin më të madh në shpenzimet ushtarake.
Studimi i SIPRI për shpenzimet e mbrojtjes është më i gjerë se përkufizimet që përdoren shpesh në diskutimet e politikave fiskale në Shtetet e Bashkuara dhe sipas llogaritjeve të tyre, Shtetet e Bashkuara shpenzuan 877 miliardë dollarë për mbrojtjen kombëtare në vitin 2022.
Mes shpenzimeve përfshihen shpenzime diskrecionale dhe të detyrueshme nga Departamenti i Mbrojtjes, Departamenti i Energjisë, Departamenti i Shtetit dhe Programi Kombëtar i Inteligjencës. Funksioni i buxhetit të mbrojtjes kombëtare (766 miliardë dollarë në 2022) përjashton shpenzimet nga Departamenti i Shtetit dhe programe të caktuara të Departamentit të Energjisë. Krahasimi ofron njohuri të dobishme mbi shkallën e madhe të shpenzimeve të mbrojtjes së SHBA-së në krahasim me kombet e tjera.
Megjithëse Shtetet e Bashkuara shpenzojnë më shumë për mbrojtjen se çdo vend tjetër, Zyra e Buxhetit të Kongresit parashikon që shpenzimet e mbrojtjes si pjesë e produktit të brendshëm bruto (PBB) do të ulen gjatë 10 viteve të ardhshme – nga 3.1 përqind e PBB-së në 2023 në 2.8 përqind në 2033. Kjo është dukshëm më e ulët se shpenzimet mesatare 50-vjeçare për mbrojtjen prej 4.3 për qind të PBB-së.
Shpenzimet e mbrojtjes së SHBA-së përbëjnë një pjesë të konsiderueshme të buxhetit federal dhe Shtetet e Bashkuara shpenzojnë shumë më tepër se vendet e tjera. Në përcaktimin e nivelit të duhur të shpenzimeve të tilla në të ardhmen, do të jetë e rëndësishme të vlerësohet nëse ato po përdoren në mënyrë efektive apo edhe përshtatja me prioritetet e tjera kombëtare.
/Përgatiti: A. Muraçi/ Liberale.al
