Ministri i Drejtësisë, Toni Gogu, ka konfirmuar se të premten ka takuar kryebashkiakun e Tiranës, Erion Veliaj, në burgun e Fierit, por ka mohuar kategorikisht pretendimet e publikuara lidhur me përmbajtjen e bisedës mes tyre.
Në një reagim publik, Gogu thotë se vizita është zhvilluar në kuadër të detyrës së tij si ministër, për t’u njohur me kushtet e trajtimit të Veliajt dhe për të dëgjuar shqetësimet e ngritura publikisht nga avokati i tij, por shprehet i habitur nga ato që i janë atribuar pas takimit.
“Nuk ka asnjë shans, në këtë botë apo në tjetrën, që unë të shqiptoj ‘mesazhet’ që më janë vënë në gojë”, deklaron Gogu, duke shtuar se nuk dëshiron të besojë se pretendimet në fjalë janë thënë apo shkruar nga vetë Veliaj.
Ministri thekson se rrethanat e vizitës janë “të dokumentuara dhe të verifikueshme”, ndërsa për pretendimet e tjera shprehet se “koha dhe e vërteta ecin dorë për dore”.
Deklarata e plotë e Ministrit Toni Gogu:
“Më vjen thellësisht keq për të pavërtetat që janë publikuar sot lidhur me vizitën time në IEVP Fier.
Po, e kam takuar Erion Veliajn të premten. Në ushtrim të përgjegjësive të mia si Ministër i Drejtësisë, kam shkuar për t’u njohur me kushtet e trajtimit të tij dhe për të dëgjuar ankesat e shprehura publikisht nga avokati i tij.
Me Erionin më lidh një miqësi shumë e hershme, të cilën e dinë të gjithë.
Por dua të jem krejt i qartë: Nuk i gjej dot arsyet pse janë stisur ato të pavërteta dhe nuk dua ta besoj që i ka thënë apo shkruar Erioni.
Kush më njeh e di se nuk ka asnjë shans, në këtë botë apo në tjetrën, që unë të shqiptoj “mesazhet” që më janë vënë në gojë. Jam vërtet i befasuar.
Kam shkuar për të dëgjuar shqetësimet e një njeriu pas një tymnaje mediatike dhe shqetësimeve të kuptueshme të kujtdo që shqetësohet kur flitet për liri e të drejta. Rrethanat e vizitës janë të dokumentuara dhe të verifikueshme.
Për të tjerat, koha dhe e vërteta ecin dorë për dore”.
Reagimi i Gogut vjen menjëherë pas lajmit dhe deklaratës së publikuar të avokatit të Veliajt, Plarent Ndrecës, se ministri i kishte shkuar me urgjencë të premten në qelitë e Fierit kryebashkiakut dhe e kishte kërcënuar në emër të kryeministrit që të dorëzonte mandatin e kryebashkiakut.