Dhjetëra supermarkete në gjashtë vende të Evropës janë prekur nga një incident i dyshuar kibernetik, që ka shënjestruar sistemet e tyre të ftohjes. Gjatë natës, temperaturat në frigoriferë dhe ngrirës janë rritur ndjeshëm, duke shkaktuar shqetësime për sigurinë e produkteve ushqimore.
Rasti është raportuar në Belgjikë, Suedi, Estoni, Holandë, Luksemburg dhe Irlandë, disa javë pas një sulmi të ngjashëm në Francë, ku u prekën qindra supermarkete.
Qendra belge për Sigurinë Kibernetike (CCB) konfirmoi për agjencinë e lajmeve Belga se është në dijeni të një incidenti që ka prekur sistemet e ftohjes së supermarketeve. “Jemi në dijeni të një incidenti, por nuk kemi informacione të mëtejshme”, deklaroi zëdhënësja Katrien Eggers.
Sipas raportimeve të medias belge, problemet u konstatuan të hënën, kur temperaturat në disa frigoriferë u rritën deri në 70 gradë Celsius. Si pasojë, u raportua se u hodhën produkte ushqimore me vlerë rreth 100 000 euro.
Në Belgjikë, sipas medias Le Soir, janë prekur rreth 40 supermarkete Delhaize Proxy, 15 dyqane Carrefour Shop & Go, 15 dyqane Intermarché dhe pesë pika të stacioneve të shërbimit Spar Q8. Probleme janë raportuar edhe në frigoriferët e grupit të kasapëve De Laet en Van Haver.
Një zëdhënës i Delhaize konfirmoi për Euronews se kompania kishte identifikuar një incident të teknologjisë së informacionit që prekte sistemet e ftohjes në disa dhjetëra dyqane. Ai tha se janë marrë menjëherë masat e nevojshme për të mbajtur dyqanet funksionale.
Ndërsa zëdhënësi i Carrefour Belgium, Mich Vergauwen, e cilësoi ngjarjen si sulm kibernetik, duke deklaruar se nuk kishte një shkak tjetër dhe se ndikimi ishte shumë i kufizuar.
Dyshohet se sulmi është kryer mes natës së së dielës dhe mëngjesit të së hënës, duke shkaktuar rritjen e temperaturave në pajisjet e ftohjes.
Probleme janë raportuar edhe në disa vende të tjera. Në Suedi, janë prekur disa dyqane të rrjetit ICA, si dhe një dyqan IKEA në Bergen. Në Irlandë, 13 dyqane të rrjetit SuperValu u prekën nga një sulm i dyshuar kibernetik, sipas një deklarate të kompanisë mëmë, Musgrave.
Në Estoni, sipas raportimeve të mediave vendase, është prekur një supermarket i rrjetit Selver. Ndërsa në Holandë, sistemet e ngrirjes dhe ftohjes të të paktën 17 kompanive u sulmuan gjatë natës, bëri të ditur një zëdhënës i furnizuesit Danfoss, pa zbuluar emrat e kompanive.
Si masë paraprake, Delhaize pezulloi gjithashtu sistemet e saj të porosive në Luksemburg, për të parandaluar një incident të ngjashëm.
Ngjarjet vijnë pas sulmit kibernetik të 12 tetorit në Francë, ku qindra supermarkete të zinxhirëve Intermarché dhe Coopérative U u prekën nga ndërhyrjet në sistemet e tyre të ftohjes.
Stephan Moelans, drejtor ekzekutiv i kompanisë së instalimit të frigoriferëve Sabcobel, i tha medias Belga se sulmi në Belgjikë përdori të njëjtin mekanizëm si ai i ndodhur më parë në Francë.
Ai tha se kompania kishte punuar gjatë javëve të fundit për të mbrojtur pajisjet e klientëve nga kjo cenueshmëri. Sipas tij, vetëm përditësimi i softuerit nuk mjafton për të zgjidhur problemin, por nevojiten edhe ndërhyrje fizike.
“Zgjidhja më e thjeshtë është menaxhimi i frigoriferëve përmes një lidhjeje të sigurt interneti. Shumica e klientëve tanë kaluan në atë lidhje pas sulmit në Francë”, u shpreh Moelans.
Sabcobel është në dijeni të rreth 20 pajisjeve të prekura, nga qindra që menaxhon në të gjithë Belgjikën.
The post Supermarketet evropiane nën sulm kibernetik, në shënjestër të hakerëve sistemet e frigoriferëve appeared first on Euronews Albania.
Burimi: Botë