Yair Netanyahu, djali i kryeministrit izraelit Benjamin Netanyahu, ka shkaktuar reagime me deklaratat e tij kundër arabëve që jetojnë në Izrael.
Në një reagim të publikuar në rrjetin social X, ai i cilësoi ata si kërcënimin më të madh për ekzistencën e Izraelit, pas programit bërthamor iranian.
Duke iu referuar rezultateve të zgjedhjeve për Knessetin e 26-të, Yair Netanyahu pretendoi se ato kanë treguar se rreziku më i madh për mbijetesën afatgjatë të shtetit izraelit, përveç Iranit, vjen nga arabët izraelitë.
“Një vend nuk mund të mbijetojë në planin afatgjatë kur 20% e popullsisë së tij identifikohet me armiqtë e tij dhe dëshiron shkatërrimin e tij”, shkroi ai.
Në vijim, djali i kryeministrit bëri edhe deklarata të tjera për islamin dhe myslimanët, duke pretenduar se shumica e tyre nuk mund të jetojnë në paqe me fqinjët e feve të tjera.
Deklaratat e tij kanë shkaktuar reagime të forta në Izrael. Deputeti arab Ahmad Tibi i cilësoi ato si raciste dhe antisemitike, duke iu përgjigjur se qytetarët arabë vazhdojnë të punojnë dhe të kërkojnë një të ardhme me bashkëpunim dhe të drejta të barabarta.
Edhe publicisti Rani Rahav reagoi duke iu drejtuar kryeministrit Benjamin Netanyahu dhe duke rikujtuar deklaratat e tij të vitit 2016 për votuesit arabë në Izrael, për të cilat kryeministri kishte kërkuar falje.
Reagimet vijnë në një klimë të tensionuar politike pas zgjedhjeve parlamentare, ku partitë arabe kanë shënuar rritje të ndjeshme dhe kanë fituar gjithsej 19 vende në Knesset, duke u bërë faktor i rëndësishëm në negociatat për formimin e qeverisë së re.