Zyrtarët e Pentagonit u kanë kërkuar disa vendeve anëtare të NATO-s, gjatë javëve të fundit, të ulin retorikën e tyre lidhur me kërcënimin që paraqet Rusia. Sipas tyre, disa deklarata të udhëheqësve dhe zyrtarëve evropianë kanë dëmtuar sigurinë e kontinentit. Këtë e bënë të ditur katër persona të njohur me çështjen.
Ndër vendet që kanë marrë mesazhe, përmes të cilave u është kërkuar të tregohen më të përmbajtur në deklaratat publike, janë Lituania, Letonia dhe Estonia, thanë burimet, të cilat folën në kushte anonimiteti. Nuk dihet nëse mesazhe të ngjashme, të përcjella gjatë takimeve dypalëshe, u janë komunikuar edhe qeverive të tjera evropiane.
Kërkesat e SHBA-së vijnë në një kohë kur administrata Trump ka rifilluar përpjekjet për të nxitur një përfundim të negociuar të luftës në shkallë të plotë në Ukrainë, e cila tashmë ka hyrë në vitin e saj të pestë. Nisma e fundit ka ndërthurur stimuj për Rusinë, përfshirë lehtësimin e sanksioneve, me presionin ndaj Ukrainës për të ndalur sulmet ndaj infrastrukturës energjetike ruse.
I pyetur për koment, një zyrtar i Pentagonit tha: “Bisedat private mes aleatëve janë thjesht të tilla, ndaj nuk do të komentojmë këto pretendime”.
Ndër komentet që kanë tërhequr vëmendjen e zyrtarëve amerikanë janë deklaratat e udhëheqësve evropianë se Rusia është e bllokuar dhe po përdor masa gjithnjë e më të dëshpëruara, ndërsa pushtimi i Ukrainës po ngadalësohet, tha një nga personat e njohur me çështjen.
Shefi i politikave të Pentagonit, Elbridge Colby, një nga figurat kryesore në procesin e rishikimit të vazhdueshëm të numrit të trupave amerikane në Evropë, ishte ndër zyrtarët amerikanë që përcollën këtë mesazh, thanë burimet. Reuters nuk arriti të përcaktonte se cilët zyrtarë të tjerë ishin të përfshirë.
Asnjë prej personave të kontaktuar, mes tyre tre zyrtarë evropianë dhe një zyrtar amerikan, nuk sugjeroi se këshillat ishin përcjellë në mënyrë konfrontuese.
EVROPA DUHET TË SHMANGË “PREKJEN” E RUSISË
Mesazhet e SHBA-së pasqyrojnë një debat brenda NATO-s lidhur me mënyrën se si duhet trajtuar publikisht kërcënimi që paraqet një Rusi gjithnjë e më agresive.
Disa zyrtarë perëndimorë kanë argumentuar se theksimi i kërcënimit nga Moska mund të jetë në favor të Kremlinit, i cili, sipas tyre, synon të mbjellë frikë dhe të dobësojë mbështetjen për Ukrainën.
Të tjerë argumentojnë se qeveritë evropiane duhet të jenë transparente, në mënyrë që t’u tregojnë qytetarëve të tyre se përballja me Moskën kërkon sakrifica dhe burime. Kjo është veçanërisht e rëndësishme në një kohë kur Rusia duket se po përshpejton një fushatë të fshehtë sabotimi në të gjithë kontinentin.
Një nga personat e njohur me çështjen i tha Reuters se Colby i kishte thënë së fundmi një zyrtari baltik se nuk duhet të ketë “ngacmime” ndaj rusëve.
Sipas këtij personi, Colby kishte përmendur publikisht si shembull të retorikës së padobishme deklaratat e evropianëve se Rusia ishte “e futur në qoshe si një mi”.
Nuk është e qartë se cilës deklaratë konkrete po i referohej Colby. Megjithatë, në fund të shtatorit, kryeministri estonez Kristen Michal e cilësoi Putinin si një “mi në cep”, duke sugjeruar se udhëheqësi rus po përdorte akte sabotimi në Evropë, ndërsa Rusia po gjendej gjithnjë e më e bllokuar në Ukrainë.
“Ne po ju ndihmojmë. Amerikanët janë atje”, tha një tjetër zyrtar evropian, duke përshkruar mesazhet e fundit private të Pentagonit. “Thjesht mos bëni zhurmë. Mos bëni zhurmë.”
Në një takim tjetër të zhvilluar së fundmi, Pentagoni i kërkoi një delegacioni estonez të ishte “i matur” në komunikimet e tij, sipas një personi të informuar për takimin. Megjithatë, ky person nuk tha se zyrtarët e Pentagonit kishin kundërshtuar ndonjë deklaratë konkrete.
Ministritë e Mbrojtjes të Lituanisë, Letonisë dhe Estonisë nuk iu përgjigjën kërkesave për koment, ndërsa NATO refuzoi të komentojë.
MOSKA VË NË PROVË GATISHMËRINË E EVROPËS
Një nga zyrtarët evropianë tha se këshilla e Pentagonit, ndonëse ishte përcjellë në mënyrë miqësore, ishte e çuditshme, duke pasur parasysh se shërbimet e inteligjencës në shtetet baltike kanë minimizuar vazhdimisht, gjatë muajve të fundit, mundësinë që Rusia të testojë dispozitat e mbrojtjes së ndërsjellë të NATO-s.
Nga ana tjetër, shërbime të tjera të inteligjencës së NATO-s kanë paralajmëruar publikisht se Rusia mund ta intensifikojë ndjeshëm fushatën e saj të sabotimit në të ardhmen e afërt.
Mesazhet e Pentagonit drejtuar zyrtarëve të NATO-s vijnë në një moment të vështirë për sigurinë evropiane.
Moska ka intensifikuar kohët e fundit fushatën e sulmeve të fshehta, të cilat mund t’i mohojë, ndaj vendeve anëtare të NATO-s, thanë zyrtarët e inteligjencës perëndimore.
Të mërkurën, prokurorët gjermanë njoftuan se dy shtetas bjellorusë ishin arrestuar, nën dyshimin se po planifikonin t’i vinin flakën një ndërtese ose një objekti të infrastrukturës kritike në zonën e Nurembergut. Në shtator, qeveria gjermane fajësoi Rusinë për një përpjekje për sulm me dronë në aeroportin e Leipzig/Halle, akuza të cilat Moska i ka mohuar.
Në të njëjtën kohë, zyrtarët amerikanë kanë diskutuar mundësinë e marrëveshjeve të biznesit me Rusinë, si pjesë e përpjekjeve të administratës Trump për arritjen e paqes në Ukrainë. Këto përpjekje kanë shkaktuar reagime të ndryshme mes zyrtarëve evropianë, shumë prej të cilëve po mbështesin vazhdimin e izolimit ekonomik të Kremlinit.
Ndërkohë, planifikuesit e Pentagonit po rishikojnë pozicionimin e forcave amerikane në Evropë, një proces që mund të çojë në një reduktim të ndjeshëm të pranisë ushtarake të SHBA-së në kontinent.
Zyrtarët amerikanë kanë deklaruar se vendet evropiane anëtare të NATO-s duhet të marrin më shumë përgjegjësi për mbrojtjen e tyre, veçanërisht në një kohë kur SHBA-ja po përqendrohet te kërcënimet në Lindjen e Mesme, Amerikën Latine dhe Azinë Lindore.
Reuters
The post Pentagoni i dërgon sinjal Europës: Ulni retorikën ndaj Rusisë appeared first on Euronews Albania.
Burimi: Botë