Të paktën 68 persona kanë humbur jetën dhe dhjetëra të tjerë janë plagosur nga përplasja e dy trenave me shpejtësi të lartë në Spanjë, të mërkurën. Sipas autoriteteve rajonale të Castilla-La Mancha, 58 persona po trajtohen në spitale, ndërsa ekipet e shpëtimit vijojnë kërkimet për të mbijetuar dhe trupa në rrënojat e trenave.
Aksidenti ndodhi në provincën e Toledos, kur një tren i kompanisë shtetërore RENFE u përplas me pjesën e pasme të një treni të kompanisë private IRYO, i cili ishte ndalur në shina. Përplasja shkaktoi daljen nga shinat të dy vagonëve të trenit IRYO.
Ngjarja është aksidenti i dytë vdekjeprurës hekurudhor në Spanjë brenda këtij viti. Në janar, 46 persona humbën jetën në një tjetër përplasje mes trenave të operuar nga të njëjtat dy kompani.
Çfarë e shkaktoi përplasjen?
Ministri spanjoll i Transportit, Oscar Puente, tha se aksidenti mund të ketë ardhur si pasojë e një urdhri të pashpjegueshëm nga qendra qendrore e komandimit të trafikut hekurudhor, pasi një sistem sigurie kishte pësuar defekt.
Sipas tij, rreth orës 08:30 të mëngjesit, sistemi i sigurisë në një segment hekurudhor prej 63 kilometrash ndaloi së funksionuari për shkak të një problemi kompjuterik. Si pasojë, të gjithë trenat në atë segment u ndalën.
Puente tha se më pas qendra e komandimit i dha trenit RENFE urdhër të rifillonte lëvizjen pa kufizime shpejtësie. Rreth orës 08:53, treni u përplas me trenin IRYO, i cili ishte ende i ndalur në shina.
Sipas ministrit, treni nuk duhej të ishte lejuar të nisej sërish, për sa kohë që sinjalizimi vazhdonte të tregonte ndalim. Edhe në rast se do të lejohej të lëvizte, ai duhej të udhëtonte me shpejtësi të reduktuar.
Autoritetet po shqyrtojnë të dhënat për të përcaktuar shpejtësinë me të cilën po lëvizte treni në momentin e përplasjes. Sipas Puentes, ajo mund të ketë arritur në 200 kilometra në orë.
“ Nuk po ia atribuoj përgjegjësinë askujt, thjesht po deklaroj faktet”, tha ministri, duke theksuar se hetimet duhet të përcaktojnë rrethanat e plota të aksidentit.
Dëshmitë e pasagjerëve
Pasagjerët përshkruan momente paniku, ndërsa përplasja shkaktoi dëme të mëdha në vagonë dhe hodhi sendet personale në ajër.
Ignacio Relano, i cili udhëtonte me trenin RENFE, i tha televizionit shtetëror TVE se treni ishte ndalur për pak çaste përpara se të rifillonte lëvizjen dhe të përplasej me trenin IRYO.
“E ndjemë trenin që u ngadalësua papritur dhe më pas përplasjen. Vagoni u anua nga njëra anë, sikur ishte gati të përmbysej. Përplasa hundën, gjithçka fluturoi, bagazhet, telefonat celularë. Gjithçka u drodh”, tregoi ai.
Ndërkohë, David Gomez, një punëtor ndërtimi që ndodhej pranë vendngjarjes me vëllanë dhe një koleg, tha për gazetën El País se ata vrapuan për të ndihmuar pasagjerët.
“Njerëzit po përpiqeshin të dilnin nga dritaret. Ne premë disa gardhe për të hyrë në zonë dhe i trajtuam njerëzit me kutitë e ndihmës së shpejtë që kishim sjellë”, tha ai, duke treguar se ndihmuan të plagosurit deri në mbërritjen e ekipeve të emergjencës.
Ministrja e Shëndetësisë, Monica Garcia, tha se përparësi e ekipeve të emergjencës ishte nxjerrja e të mbijetuarve dhe e trupave nga vagonët më të dëmtuar.
Reagimet pas tragjedisë
Kryeministri spanjoll, Pedro Sanchez, vizitoi vendin e aksidentit dhe njoftoi se qeveria do të shpallte tri ditë zie kombëtare.
“Sot e gjithë Spanja është në zi”, deklaroi Sánchez, duke kërkuar masa më të forta sigurie për të rikthyer besimin te sistemi hekurudhor me shpejtësi të lartë.
Edhe mbreti Felipe VI dhe mbretëresha Letizia shprehën ngushëllimet për familjet e viktimave dhe mbështetjen për të plagosurit. Presidentja e Komisionit Evropian, Ursula von der Leyen, tha se Evropa ndan dhimbjen e familjeve të prekura nga tragjedia.
Për shkak të aksidentit, shërbimi hekurudhor u pezullua mes Madridit, Ciudad Realit dhe Andaluzisë. Federata Spanjolle e Futbollit shtyu gjithashtu 24 ndeshjet e Kupës së Mbretit që ishin planifikuar për të mërkurën.
Dy aksidente vdekjeprurëse brenda nëntë muajsh
Përplasja e fundit ka rikthyer shqetësimet për sigurinë e rrjetit hekurudhor në Spanjë. Në janar, 46 persona humbën jetën kur një tren IRYO doli nga shinat dhe u përplas me një tren RENFE që po vinte nga drejtimi i kundërt, pranë Adamuzit, në rajonin e Kordobës.
Pas atij aksidenti, autoritetet premtuan më shumë mirëmbajtje dhe ulën shpejtësinë maksimale të trenave në disa segmente.
Spanja ka investuar për dekada në zhvillimin e hekurudhave me shpejtësi të lartë dhe ka ndërtuar rreth 3 900 kilometra linja të këtij lloji. Megjithatë, sindikata e punonjësve të hekurudhave ka ngritur pikëpyetje nëse liberalizimi i shërbimit dhe rritja e trafikut janë shoqëruar me mirëmbajtjen e nevojshme të infrastrukturës.
Joan Rodríguez, zëdhënës i sindikatës, tha për televizionin TVE se rritja e përdorimit të rrjetit është një faktor që duhet marrë në konsideratë. Ai theksoi se kjo nuk do të thotë se liberalizimi ka qenë shkaku përcaktues i aksidenteve.
Hetimet pritet të përcaktojnë përgjegjësitë dhe rrethanat e plota të përplasjes.
The post Çfarë e shkaktoi aksidentin hekurudhor me 68 viktima në Spanjë? appeared first on Euronews Albania.
Burimi: Botë