E veja e opozitarit rus Alexei Navalny ngre alarmin: Regjimet autoritare dhe e djathta ekstreme në Evropë po forcojnë bashkëpunimin
E veja e opozitarit rus Alexei Navalny, Yulia Navalnaya, ka paralajmëruar për rritjen e bashkëpunimit mes regjimeve autoritare dhe partive të ekstremit të djathtë në Evropë, duke theksuar se kjo prirje përbën një kërcënim për demokracinë dhe liritë themelore.
Gjatë një prezantimi në Londër të një raporti të ri mbi atë që cilësohet si “solidaritet autoritar”, Navalnaya, e cila drejton Fondacionin për të Drejtat e Njeriut, tha se këta aktorë po mësojnë nga njëri-tjetri dhe po bashkëpunojnë gjithnjë e më shumë.
“Ata mësojnë nga njëri-tjetri, bashkëpunojnë” dhe do të “munden vetëm nëse bashkëpunojnë edhe ata që luftojnë për liri”, u shpreh ajo para gazetarëve.
Sipas Navalnayas, regjimet autoritare po bëhen gjithnjë e më të sofistikuara në mënyrën se si veprojnë, duke shfrytëzuar sistemet financiare dhe ligjore të vendeve perëndimore për të anashkaluar kufizimet dhe sanksionet.
Raporti evidenton se partitë evropiane të klasifikuara si të ekstremit të djathtë po përpiqen të forcojnë dhe të bëjnë më të dukshme marrëdhëniet mes tyre, duke synuar të fitojnë legjitimitet politik përmes mbështetjes së ndërsjellë.
Mes partive të përmendura janë Tubimi Kombëtar (RN) në Francë, Alternativa për Gjermaninë (AfD) dhe Reform UK në Mbretërinë e Bashkuar.
Një nga shembujt e përmendur është pjesëmarrja e Jordan Bardellas, presidentit të Tubimit Kombëtar në Francë, në konferencën e Reform UK në fillim të shtatorit.
Dokumenti thekson gjithashtu se AfD ka thelluar së fundmi marrëdhëniet me Rusinë, duke kaluar përtej mbështetjes financiare drejt një dialogu më të gjerë dhe më substancial.
Këto zhvillime vijnë në një kohë kur Evropa përballet me sfida të rëndësishme politike dhe kur zgjedhjet e ardhshme në vende si Franca dhe Spanja mund të ndikojnë në ekuilibrat politikë të kontinentit.
Raporti e cilëson Pekinin dhe Moskën si shtyllat kryesore të një boshti global të autoritarizmit, duke vënë në dukje se bashkëpunimi në fushën e medias dhe teknologjisë po merr forma gjithnjë e më të institucionalizuara.
Sipas dokumentit, ky bashkëpunim shtrihet edhe në Afrikë dhe në Azinë Juglindore, ku vende dhe aktorë me interesa të përbashkëta po forcojnë lidhjet mes tyre.
Raporti paralajmëron gjithashtu se konfliktet ndërkombëtare mund të përshpejtojnë krijimin e aleancave ushtarake mes regjimeve autoritare, duke rritur ndikimin dhe kapacitetet e tyre për të vepruar në koordinim.
Yulia Navalnaya është shndërruar në një nga figurat kryesore të opozitës ruse në mërgim pas vdekjes së bashkëshortit të saj, Alexei Navalny, i cili humbi jetën në burg në vitin 2024.
Sipas rezultateve të një hetimi evropian të publikuar në shkurt, Navalny u helmua me një toksinë të rrallë.
Raporti i ri është hartuar nga Fondacioni për të Drejtat e Njeriut në bashkëpunim me organizatën joqeveritare amerikane Action for Democracy, në kuadër të “Indeksit të Bashkëpunimit Autoritar”.
Domonkos Kovacs, drejtuesi i projektit që çoi në krijimin e indeksit, tha se synimi është të nxirret në pah rritja e këtij solidariteti, i cili u mundëson regjimeve autoritare të mbështesin njëri-tjetrin në shtypjen e kundërshtimit dhe të zërave kritikë.