Franca po përgatitet për një tjetër ditë të tensionuar protestash më 24 tetor. Qeveria ka mobilizuar rreth 70 mijë policë dhe xhandarë në të gjithë vendin për të parandaluar përsëritjen e dhunës së javës së kaluar.
Ministri i Brendshëm Laurent Nuñez paralajmëron se shteti do të jetë “i pakompromis” ndaj vandalëve dhe plaçkitësve, ndërsa në terren do të angazhohen edhe njësi elitare si RAID, GIGN dhe BRI, si dhe helikopterë e dronë.
Autoritetet thonë se po monitorojnë veçanërisht thirrjet në rrjetet sociale nga ekstremi i majtë për sulme ndaj ndërtesave publike, ndërsa njësitë elitare do të përdoren kryesisht për mbrojtjen e objekteve strategjike. Në disa qytete, përfshirë Lionin, janë ndaluar protestat në zona të caktuara, ndërsa prefektët po vlerësojnë individualisht rrezikun e trazirave të reja.
Presidenti Emmanuel Macron ka thirrur Këshillin e Mbrojtjes dhe pritet të takohet me organizatat studentore për të dëgjuar kërkesat e tyre, përpara se të vizitojë forcat e rendit. Paralelisht, kryeministri Sébastien Lecornu ka kërkuar nga prefektët të shqyrtojnë vendosjen e orëve policore të pjesshme dhe lokale në zonat më të rrezikuara.
Ish-kryeministri Gabriel Attal ka paralajmëruar se, nëse situata nuk qetësohet pas protestave të së shtunës, mund të jetë e nevojshme shpallja e gjendjes së jashtëzakonshme. Ndërkohë, përplasja politike është thelluar, me kritikë të qeverisë që e akuzojnë Macronin se ka humbur kontrollin mbi situatën, ndërsa autoritetet përpiqen të shmangin një tjetër valë dhune dhe vandalizmi.