Ka nisur në mesnatë heshtja zgjedhore në Serbi, në prag të zgjedhjeve të jashtëzakonshme parlamentare, të cilat do të mbahen të dielën. Ajo do të zgjasë deri në orën 20:00, kur mbyllen qendrat e votimit.
Gjatë kësaj periudhe ndalohet çdo formë e fushatës zgjedhore dhe çdo përpjekje për të ndikuar në vullnetin e votuesve. Legjislacioni serb ndalon gjithashtu publikimin e sondazheve dhe vlerësimeve të rezultateve, promovimin e kandidatëve dhe programeve të tyre, si dhe thirrjet për të votuar ose për të mos votuar për lista të caktuara.
Sipas REL, sfida kryesore ndaj Partisë Përparimtare Serbe (SNS) të Aleksandar Vuçiqit vjen nga një lëvizje studentore, e cila u fuqizua pas protestave të gjata kundër korrupsionit dhe qeverisë.
Lëvizja studentore nuk ka një udhëheqës formal dhe lista e saj përbëhet kryesisht nga figura jopartiake, përfshirë profesorë universitarë. Në garë marrin pjesë gjithsej 18 lista zgjedhore, mes tyre edhe dy koalicione opozitare të përfaqësuara në parlament, një proevropian dhe një i krahut të djathtë.
Zgjedhjet zhvillohen për 250 vende në Parlamentin e Serbisë. Listat e zakonshme duhet të marrin të paktën 3% të votave për të siguruar mandate, ndërsa listat e pakicave kombëtare përfitojnë nga rregulla të veçanta dhe nuk i nënshtrohen të njëjtit prag zgjedhor.