Në Ksamil u vra një turist. Në Dhërmi vjen një DJ. E mes këtyre dy lajmeve, Edi Rama ka zgjedhur se cilin të komentojë.
Kryeministri ka ndarë lajmin se një prej emrave të njohur të muzikës elektronike ndërkombëtare, CamelPhat, do të performojë më 21 gusht në Dhërmi.
Duoja britanike e përbërë nga Dave Whelan dhe Mike Di Scala vjen për herë të parë në Shqipëri dhe padyshim që për turizmin dhe jetën e natës në rivierë është një aktivitet që meriton vëmendje.
Vetëm se disa kilometra më tutje, Shqipëria turistike ka prodhuar këto ditë një lajm shumë më të rëndë.
Luis Miguel Varela Mendes erdhi në Shqipëri për pushime dhe u vra me thikë në Ksamil.
Ngjarja ka marrë përmasa përtej një kronike të zakonshme. Një turist i huaj humbi jetën pas një konflikti të nisur në një kompleks nate, 11 persona janë arrestuar, dy janë shpallur në kërkim dhe mes personave të përfshirë në hetim kanë dalë edhe punonjës të strukturave shtetërore që punonin në sigurinë private.
I dyshuari kryesor për vrasjen u kap disa orë më vonë në Levan, i fshehur në bagazhin e një automjeti.
Një efektiv policie u arrestua nën dyshimin se e ndihmoi të largohej.
Bekim Bulica, pronari i lokalit ku sipas hetimeve nisi konflikti, është shpallur në kërkim.
Ngjarja ka kaluar Adriatikun dhe ka mbushur faqet e mediave portugeze, ndërsa në rrjetet sociale në Portugali ka nisur edhe debati për sigurinë e turistëve në Shqipëri.
Nga Edi Rama? Asnjë gjysmë fjale.
As një reagim për turistin që erdhi për pushime dhe përfundoi i vrarë. As një mesazh për familjen e tij. As një reflektim publik për faktin se një ngjarje e tillë ndodhi në zemër të një prej destinacioneve që qeveria promovon me më shumë krenari jashtë vendit.
Por për CamelPhat, lajmi u nda.
Dhe këtu ironia bëhet pothuajse e shkruar vetë.
Në Shqipërinë turistike të reklamave qeveritare, Ksamili dhe Dhërmiu janë vitrina. Janë videot me ujin e kristaltë, shezlongët, resortet, perëndimet e diellit dhe netët me muzikë elektronike.
Kur vjen një DJ ndërkombëtar, vitrina ndriçohet.
Kur një turist i huaj vritet, dritat fiken.
Sigurisht, ardhja e CamelPhat nuk ka asnjë lidhje me krimin në Ksamil dhe koncerti nuk mund të mbajë përgjegjësi për atë që ndodhi. Problemi është tjetër: selektiviteti i komunikimit të kryeministrit për turizmin që drejton dhe promovon qeveria e tij.
Kur Shqipëria shënon miliona turistë, shifrat shpërndahen.
Kur hapet një resort, publikohet.
Kur vjen një artist i famshëm, promovohet.
Por kur një turist 21-vjeçar vritet në një prej destinacioneve më të njohura të vendit dhe historia përfundon në mediat e shtetit nga vinte viktima, heshtja bëhet pjesë e komunikimit.