Një ditë përpara mbledhjes së zgjeruar të Grupit Parlamentar të Partisë Socialiste, ku kryeministri Edi Rama do të mbledhë deputetët dhe ministrat në Pallatin e Brigadave, mazhoranca ka vendosur të shtyjë mbylljen e sesionit parlamentar.
Në vend që seanca e fundit të zhvillohej sot, Kuvendi do të mblidhet sërish më 30 korrik, një lëvizje që sipas burimeve lidhet me ndryshimet e pritshme në kabinetin qeveritar.
Vendimi u miratua gjatë seancës së sotme plenare, ku deputetët votuan që seanca e radhës të zhvillohet më 30 korrik. Zyrtarisht, caktimi i kësaj date erdhi pasi në Konferencën e Kryetarëve nuk u arrit dakordësi për kalendarin dhe rendin e ditës, duke bërë që çështja t’i kalonte për vendimmarrje vetë Kuvendit.
Megjithatë, sipas burimeve, arsyeja reale e shtyrjes së mbylljes së sesionit parlamentar lidhet me zhvillimet që priten nesër. Sipas burimeve, në mbledhjen që do të mbahet te Pallati i Brigadave, Edi Rama do të largojë pjesën më të madhe të ministrave. Dhe sipas burimeve, mazhoranca i ka lënë kohë Presidentit të Republikës të dekretojë ministrat e rinj, me qëllim votimin e tyre në seancën e 30 korrikut.
Në favor të këtij skenari flet edhe rendi i ditës i seancës së ardhshme. Aktualisht, në axhendë janë vetëm dy projektligje, ai “Për Arkivat” dhe projektligji “Për të Drejtën e Autorit”, çështje që nuk konsiderohen me peshë politike dhe që, sipas burimeve, nuk do të ishin të mjaftueshme për të justifikuar shtyrjen e mbylljes së sesionit me një javë.
Vëmendja tashmë është përqendruar te mbledhja e së premtes në Pallatin e Brigadave, ku Edi Rama pritet të analizojë punën e qeverisë, ministrave dhe deputetëve socialistë.
Megjithëse në axhendën zyrtare nuk parashikohen ndryshime në kabinet, në korridoret e mazhorancës prej ditësh flitet për një riformatim të qeverisë, ndërsa vendimi për shtyrjen e seancës plenare shihet si hapi procedural për finalizimin e këtyre lëvizjeve.
