Sistemet e teknologjisë dhe sigurisë kibernetike në Shqipëri po kthehen në “gostinë” më të rëndomtë për rrjetet e klientelizmit dhe kompanitë nën shënjestrën e SPAK. Një tjetër tender i dyshimtë, që mban erë të pastër korrupsioni dhe paracaktimi, është mbyllur së fundmi nga Operatori i Shpërndarjes së Energjisë Elektrike (OSHEE Group sh.a), institucion nën varësinë e ministrit Enea Karakaçi.
Objekti i këtij prokurimi me numër reference REF-81672-04-10-2026 është “Mirëmbajtje dhe vlerësimi i cënueshmerisë (vulnerabiliteteve), si dhe i ekspozimit kundrejt risqeve kibernetike për të dhënat e sistemeve IT”. Fondi limit i vënë në dispozicion nga paratë e taksapaguesve ishte 69,473,333.00 lekë të reja pa TVSH ose rreth 900 mijë euro me TVSH.
Fitues i këtij tenderi është shpallur kompania COMMUNICATION PROGRESS, në pronësi të Gentian Likajt, duke ofruar vlerën 63,990,000.00 lekë të reja pa TVSH apo rreth 810 mijë euro me TVSH.
Zhvatje deri në qindarkën e fundit: Fiton 92.1% të fondit limit
Një llogaritje e thjeshtë matematizore zbulon atë që në gjuhën e audituesve njihet si “Flamur i Kuq” i korrupsionit.
Kompania fituese ka arritur të rrëmbejë plot 92.1% të fondit limit, një tregues i qartë që në këtë procedurë nuk ka pasur asnjë lloj gare apo konkurrence reale për të kursyer paratë e buxhetit të shtetit, por thjesht një ndarje të paracaktuar parash.
Teatri i “garës”: Dy kompani hyjnë pa vlerë, mes tyre “Soft & Solution” e Ermal Beqirit
Nëse sheh dokumentet e këtij tenderi, skema e farsës bëhet edhe më trashanike. Në procedurën e hapur mbi kufirin e lartë monetar, kanë marrë pjesë formalisht 4 firma.
Megjithatë, dy prej tyre kanë hyrë në garë thjesht për numër, sa për të plotësuar numrin minimal të pjesëmarrësve, duke mos afruar asnjë vlerë ekonomike. Ajo që të bën përshtypje është se njëra nga këto firma që ka hyrë pa ofertë është pikërisht SOFT & SOLUTION, e zotëruar nga biznesmeni i njohur i IT-së, Ermal Beqiri. Kjo lëvizje tregon një koordinim të pastër mes kompanive për të lënë rrugën e lirë drejt fitores.
Kush është Gentian Likaj dhe lidhjet e nxehta me dosjen e SPAK?
Gentian Likaj, pronari i “Communication Progress”, nuk është një emër i panjohur për drejtësinë. Ai është bashkëjetuesi i motrës së Ermal Beqirit, ky i fundit i shpallur në kërkim si pjesë e mega-skandalit të tenderave miliona eurosh të AKSHI-t.
Sipas dosjes hetimore të Prokurorisë së Posaçme (SPAK), Likaj dyshohet se ka shërbyer si një lloj “prestanome” për të vijuar skemën e zhvatjes së fondeve publike kur kompanitë kryesore të Beqirit ranë në sy. “Communication Progress” ka përfituar mbi 21 milionë euro në vitet e fundit përmes procedurave të dyshimta me kritere të paracaktuara.
Për shkak të këtyre transaksioneve fiktive dhe lidhjeve të ngushta me dyshen Beqiri-Agasi, Gentian Likaj është futur zyrtarisht në dosjen e nxehtë të SPAK dhe është thirrur e marrë në pyetje nga prokurorët e posaçëm nën akuzat e korrupsionit dhe manipulimit të prokurimeve publike.
Pavarësisht se është nën hetim penal nga SPAK për të njëjtat skema, kjo gjë nuk e ka penguar OSHEE-në e Enea Karakaçit që t’i besojë Likajt dhe kompanisë së tij plot 810 mijë euro për “sigurinë kibernetike”, duke dëshmuar se oktapodi i IT-së vazhdon të jetë i paprekshëm nga shteti.
/JOQ
