Nora Malaj gjatë një interviste për Euronews Albania foli për protestën duke e quajtur një lëvizje sociale që, sipas saj, shkon përtej të majtës dhe të djathtës, duke përfshirë si votuesit që e kanë mbështetur, ashtu edhe ata që nuk e kanë votuar.
Malaj theksoi rëndësinë e diasporës shqiptare në procesin zgjedhor dhe ka kritikuar mënyrën se si është menaxhuar kjo çështje, duke thënë se shqiptarët jashtë vendit nuk e falin kur një premtim nuk zbatohet.
Nora Malaj e sheh këtë protestë si një test të pushtetit, duke paralajmëruar se kur pushteti grumbullohet i gjithi në një dorë, ai kthehet në problem.
“Kjo është një lëvizje sociale e madhe që ka përfshirë përtej të majtës dhe të djathtës atë teori që erdhi kryeministri që në të krye dhe tha: “Unë do të bëj një politikë përtej të majtës dhe të djathtës.” Është një lëvizje sociale ku ka brenda si ata që e kanë votuar, ashtu edhe ata që nuk e kanë votuar. Ajo që shoh unë në qasjen time është një lëvizje sociale që ka lexuar mirë votën e diasporës.
U ngritëm me kauzën e diasporës dhe bëmë një fushatë shumë të madhe në emër të futjes në BE dhe në emër të marrjes së votuesve në diasporë si detyrim që kishim. Por harruam një gjë të madhe, jo ne, por ata që merren me menaxhimin e gjithçkaje, që shqiptarët e diasporës, përtej faktit që në thelbin e tyre e kanë Shqipërinë, janë edhe qytetarë të një vendi ku, kur u premtohet diçka, nuk ta falin nëse nuk e zbaton.
Meqë përfshin votime, pra meqë patën mundësinë për të votuar dhe për të zgjedhur, ata që zgjodhën e bënë, ata që nuk zgjodhën gjithashtu. Kështu dolën edhe rezultatet, kështu na thanë, dhe pjesa më e madhe kështu e ligjëroi dejure. Çfarë është de facto nuk e dimë. E gjithë kjo ishte për të parë dhe për të testuar pushtetin, i cili pas vitit të 13-të, në vitin e 14-të, fillon e kthehet në një shumatore. Një shprehje latine thotë, çdo gjë që e kalon masën, kthehet në të kundërt.”, tha Nora Malaj.
