Studentja Laura Kërtalli deklaroi se protesta qytetare ka hyrë tashmë në një fazë të re, duke marrë karakter të qartë politik.
E ftuar në emisionin “Off the Record” nga Andrea Danglli në A2CNN, Kërtalli u shpreh e gatshme që t’i bashkohet një force të re politike.
Sipas saj, pakënaqësia e shprehur në protestë duhet të kanalizohet në një lëvizje të organizuar politike, e cila të ketë si element unifikues karakterin kombëtarist apo nacionalist.
“Ne e pranojmë me kënaqësinë më të madhe ftesën për t’u bërë pjesë e një lëvizje politike të re. Protesta tashmë është shndërruar në politike. Ka pasur dy faza, Zvërneci, dhe faza e dytë që ka një sërë kërkesash që kanë karakter politik. Protesta mbart në vetvete një fabul sepse kjo lëvizje që ne pretendojmë të bëjmë, me karakter politik, duhet të ketë patjetër një element unifikues që ta shndërrojë të gjithë këtë pakënaqësi në një lëvizje me karakter politik. Ky karakter unifikues duhet të jetë ajo çfarë na bashkon të gjithëve, kombësia ose ndjenja nacionaliste, për të vetmen arsye se është mesazhi i kësaj fabule”, u shpreh ajo.