Mes takimeve të Macron me Malin e Zi dhe sinjaleve të Merz-it për rreshtimin me Ukrainën e Moldavinë, Shqipërisë së Ramës i mbeti vetëm ceremonia teknike dhe shija e një talljeje europiane…
Ceremonia gjithë zhurmë për kalimin e IBAR-it në Bruksel nga Edi Rama ishte në realitet, një skenë tragjikomike.
Madje duket se edhe vetë kryeministri i Shqipërisë e ka ndjerë thellë rrengun, apo shqip: ‘futjen’, që i kanë bërë liderët realë të Bashkimit Europian, përkatësisht kancelari gjerman dhe presidenti francez.
Të mësuar prej vitesh me skenat e tij prej kllouni cirku nëpër samite, ku ka tentuar të bëhet gazi i botës në mënyra nga më të ndryshmet, ata i kanë lënë një skenë të tillë në Bruksel me Marta Kos dhe përfaqësueset e presidencës qipriote të BE-së.
Përkatësisht dy personazhe me peshë politike afër zeros absolute. Megjithatë, të instruktuara me kujdes, ato e dinin skenën përmendësh dhe, me cinizëm, i dhanë Edi Ramës një mësim të mirë.
Duke i ofruar një darkë me pjatë bosh, siç ndodh me kllounët në cirk, që përpiqen të argëtojnë fëmijët, ndërkohë që vetë janë të pushtuar nga dhimbja dhe frustrimi.
Shqipëria e Edi Ramës ka kaluar thjesht një kapitull të një dokumenti teknik, i cili, edhe pse është pjesë e metodologjisë, nuk ka ndonjë peshë reale politike.
Ndërkohë, Emmanuel Macron ka pritur në Pallatin Élysée kryeministrin e Malit të Zi, si për të treguar se cili është vendi që do të hyjë realisht në BE, ndërsa Shqipërisë së Edi Ramës i kanë lënë IBAR-in dhe Martën.
“Mirë se erdhe, Milojko Spajiç. Sot ne po forcojmë marrëdhëniet ndërmjet Malit të Zi dhe Francës në disa sektorë strategjikë, duke përfshirë ekonominë dhe transportin. Franca qëndron pranë popullit malazez për ta mbështetur në rrugën e integrimit europian”, shkroi Macron në mesazhin e tij në rrjetet sociale.
Ndërkaq, kancelari gjerman Friedrich Merz i ka kërkuar presidencës së BE-së që disa vende kandidate, si Shqipëria, të vendosen në të njëjtën radhë me Ukrainën dhe Moldavinë për integrimin në Bashkimin Europian.
Jo më kot, në konferencën e përbashkët për shtyp në Bruksel me Marta Kos, Edi Ramës iu bë pikërisht pyetja për propozimin e Merz-it, kur në realitet nuk kishte përse të pyetej kryeministri i Shqipërisë për këtë çështje.
Duket si një hakmarrje politike e fortë ndaj lëvizjeve pa bosht që Edi Rama bën prej kohësh, vetëm e vetëm për të shpëtuar veten nga një hetim i nivelit të lartë.
Ndërkaq, si për ta vërtetuar këtë, kancelari gjerman ka thënë që samiti i Procesit të Berlinit, ku do të mblidhen krerë nga vendet e mëdha të BE-së, plus Britania e Madhe, të zhvillohet në tetor në Cetinjë të Malit të Zi.
Ky është një tjetër sinjal i talljes që po bëhet me Edi Ramën, të cilit i kanë lënë IBAR-in në dorë.
Ndaj edhe kryeministri shqiptar pati të vetmin moment serioz në konferencën e shtypit në Bruksel, kur tha se “ne nuk jemi aq të vegjël sa të mos merremi parasysh dhe të mëdhenjtë nuk janë aq të vetëmjaftueshëm”.
Por tani është vonë. Ajo fjali as nuk u dëgjua dhe as nuk u shënua nga askush.
Sepse prej vitesh, nga “artisti-kryeministër”, janë mësuar të dëgjojnë vetëm karagjozllëqe për meme./Pamfleti
