“Në pesë muajt e parë të këtij viti, mbërritjet e parregullta janë ulur me 54% krahasuar me të dhënat e konsoliduara të vitit të kaluar, i cili vetë kishte regjistruar një rënie prej 60% krahasuar me periudhën kur morëm detyrën”.
Ministri i Brendshëm italian, Matteo Piantedosi, gjatë Festivalit të Ekonomisë në Trento, paraqiti shifrat që lidhen me luftën kundër emigracionit të paligjshëm gjatë mandatit të kësaj qeverie, duke thënë se ato dëshmojnë rezultatet e arritura, pavarësisht përpjekjeve të ndryshme për të penguar politikat e kontrollit.
Ai shtoi se “po vazhdojmë një angazhim për ta bërë më efikas procesin e riatdhesimeve. Kemi rritur raportin mes riatdhesimeve dhe mbërritjeve të parregullta nga 10,2% në 34%. Ky është rezultat i punës që po bëjmë dhe i marrëdhënieve shumë të rëndësishme ndërkombëtare”.
Sipas Piantedosit, qasja italiane ndaj emigracionit është bërë me kalimin e viteve edhe qasje europiane, pavarësisht kritikave ndaj kryeministres Giorgia Meloni për një izolim të pretenduar ndërkombëtar. Ai tha se këtë e dëshmon edhe Pakti i ri Europian për Migracionin, i cili, sipas tij, konfirmon dhe forcon modelin e Shqipërisë.
Projekti italian në Shqipëri, tha ministri, është kundërshtuar që në fillim, por po tregon se është një instrument efektiv që po merret si shembull edhe nga vende të tjera europiane.
“Është një operacion inovativ, që do të karakterizojë të ardhmen tonë. Shpenzimet janë bërë kryesisht për investime, madje përpara menaxhimit të strukturave. Personeli i policisë i angazhuar në qendër është 200 njësi dhe jo 500”, deklaroi ai, duke iu referuar edhe hyrjes në fuqi të rregulloreve europiane.
Ministri iu përgjigj gjithashtu kritikëve që gjatë muajve dhe viteve të fundit kanë folur për shpërdorim fondesh dhe dështim të projektit. “Në vitin 2025, për Qendrën e Riatdhesimeve në Shqipëri janë shpenzuar 50 milionë euro. Fondi i parashikuar në buxhet ka një mbulim maksimal vjetor prej 134 milionë eurosh. Kemi riatdhesuar 84 persona, mes tyre të dënuar për vrasje, dhunë seksuale ndaj të miturve, vjedhje dhe trafik droge”, tha Piantedosi.
Ai krahasoi këtë operacion me misionin “Mare Nostrum”, për të cilin deklaroi se “solli në Itali 500 mijë persona në tre vite, nga të cilët 70-80% nuk kishin të drejtë për mbrojtje ndërkombëtare”, duke shtuar se operacioni kishte “një kosto prej 8 miliardë lirash: në një vit u shpenzuan 110 milionë”.
“Më mirë të shpenzohen 50 milionë euro për të riatdhesuar 84 persona të rrezikshëm apo të lejohen të hyjnë qindra mijëra njerëz pa të drejtë që më pas i kushtojnë miliarda euro sistemit tonë të pritjes?”, pyeti ministri, duke e cilësuar këtë si një pyetje retorike.
Piantedosi theksoi se emigracioni “është dhe duhet të jetë mbi të gjitha një mundësi”, por paralajmëroi se “të mohosh faktin se ai mund të jetë edhe një problem që kërkon menaxhim dhe kompleksitet, do të thotë të bësh një operacion ideologjik që nuk na çon askund”.
