Irani po studion krijimin e një sistemi të ri sigurimesh detare të bazuar në bitcoin për anijet që kalojnë përmes Ngushticës së Hormuzit, në një kohë kur tensionet me Shtetet e Bashkuara dhe Izraelin vazhdojnë të rriten.
Sipas platformës ekonomike arabe Asharq-Bloomberg, e lidhur me grupin Bloomberg dhe duke cituar dokumente të publikuara nga agjencia iraniane Fars, projekti do të quhet “Hormuz Safe” dhe synon kompanitë iraniane të transportit detar si edhe pronarët e mallrave që lëvizin në Gjirin Persik dhe rrugët përreth Hormuzit.
Raporti thotë se policat e sigurimit do të paguhen me bitcoin dhe do të shoqërohen me dokumente “të verifikueshme kriptografikisht”. Sipas dokumenteve të atribuuara Ministrisë iraniane të Ekonomisë dhe Financave, sistemi mund t’i sjellë Republikës Islamike mbi 10 miliardë dollarë të ardhura, megjithëse nuk është bërë publik një afat kohor apo mënyra konkrete e funksionimit të skemës.
Ngushtica e Hormuzit konsiderohet një nga korridoret më strategjike të energjisë në botë, pasi një pjesë e madhe e eksporteve globale të naftës kalon përmes saj. Çdo zhvillim që lidhet me sigurinë e lundrimit në këtë zonë monitorohet me shqetësim nga tregjet ndërkombëtare dhe fuqitë perëndimore.
Nisma iraniane vjen në një moment tensioni të lartë diplomatik dhe ushtarak me Uashingtonin. Sipas Axios, administrata Trump e konsideron të pamjaftueshme propozimin e fundit që Teherani i ka dërguar SHBA-së përmes Pakistanit në kuadër të negociatave për programin bërthamor.
Burime amerikane thanë për Axios se Shtëpia e Bardhë mendon se oferta iraniane “nuk përfaqëson një përparim domethënës” dhe nuk mjafton për arritjen e një marrëveshjeje.
Presidenti amerikan Donald Trump pritet të mbledhë në “Situation Room” drejtuesit kryesorë të sigurisë kombëtare për të diskutuar opsionet ushtarake ndaj Iranit, ndërsa një zyrtar amerikan paralajmëroi se, nëse Teherani nuk ndryshon qëndrim, negociatat mund të vazhdojnë “me bomba”.
Sipas administratës amerikane, Irani ka deklaruar se nuk synon të zhvillojë armë bërthamore, por nuk ka ofruar angazhime të qarta për ndalimin e pasurimit të uraniumit apo dorëzimin e rezervave të uraniumit të pasuruar në nivele të larta.
Zyrtarët amerikanë kanë mohuar gjithashtu raportimet se SHBA është e gatshme të lehtësojë sanksionet pa kushte. “Kemi nevojë për një marrëveshje reale, të fortë dhe të detajuar për programin bërthamor. Përndryshe do të flasim përmes bombave.”, tha një burim për Axios.
Analistët vlerësojnë se projekti iranian për sigurimet detare me bitcoin mund të shihet edhe si përpjekje për të shmangur sistemin financiar tradicional ndërkombëtar dhe efektet e sanksioneve perëndimore, duke përdorur kriptomonedhat si alternativë për transaksionet ndërkombëtare në një moment izolimi ekonomik dhe presioni gjeopolitik.
