Sali Berisha sulmoi një televizion kombëtar menjëherë pasi në studio u shfaq ish-drejtoresha e AKSHI-t, Mirlinda Karçanaj, e akuzuar për korrupsion dhe pastrim parash. Me gjuhën e zakonshme të viktimizimit politik, Berisha deklaroi se media po “pastronte figurën” e Karçanajt.
Por, problemi nuk është çfarë tha Berisha. Problemi është hipokrizia që shoqëron kryetarin e opozitës gjithë këto vite në politikë.
Kjo, sepse në të njëjtin televizion, vetëm pak muaj më parë, doli edhe Argita Berisha. Vajza e liderit të opozitës, bashkëshorti i së cilës është përfshirë në dosje dhe akuza publike për pastrim parash nga SPAK. Atëherë nuk pati asnjë reagim nga Berisha. Nuk tha se televizioni po “pastronte figurën” e familjes së tij. Nuk sulmoi moderatoren. Nuk denoncoi median. Heshti.
Pra, sipas standardit të Berishës, pastrim figure quhet vetëm kur intervistohet kundërshtari apo dikush që nuk i shërben narrativës së tij politike.
Akoma dhe më tallje me publikun është kur televizioni i familjes Berisha, Syri TV, i ka hapur ekranin plot tre herë ish-zv.kryeministrit Arben Ahmetaj, një prej njerëzve më të akuzuar nga SPAK për korrupsion dhe pastrim parash. Ahmetaj, i konsideruar për vite si simbol i aferave korruptive të qeverisë Rama, është trajtuar nga opozita thuajse si “dëshmitari i shenjtë” kundër qeverisë.
Atëherë lind pyetja logjike: kur Ahmetaj del në Syri TV, kjo nuk quhet pastrim imazhi? Kur Argita Berisha del në televizion kombëtar, kjo nuk quhet rehabilitim publik? Apo standardi ndryshon sipas mbiemrit dhe interesit politik?
Nëse një media interviston një person nën hetim apo të akuzuar, kjo nuk do të thotë automatikisht se po i pastron figurën. Përndryshe, edhe vetë Berisha duhet të pranojë se mediat pranë tij janë kthyer në lavanderi politike për çdo figurë që i leverdis opozitës.
Por, Berisha nuk ka problem me të akuzuarit për korrupsion. Ka problem vetëm me ata që nuk i kontrollon vetë.