Deputeti socialist Erion Braçe ka shpërthyer sot në Kuvend ndaj ministrit të Bujqësisë, Andis Salla, pasi ky i fundit mungoi në interpelancën e kërkuar prej tij për çështjen e kafshëve të rrugës dhe mënyrën e trajtimit të tyre pas ngordhjes.
Braçe e cilësoi mungesën e ministrit si mungesë të rëndë respekti ndaj Kuvendit dhe një përpjekje për t’iu shmangur përgjegjësisë politike për situatën alarmante në sektorin e veterinarisë dhe menaxhimin e kafshëve endacake. Ministri ju shmang edhe një interpelance në datën 7 maj.
Teksa mori fjalën në foltore, deputeti socialist ironizoi faktin që ministri i Bujqësisë kishte deleguar përballjen parlamentare te ministri për Pushtetin Vendor, Ervin Demo.
“Është mungesë e thellë respekti ndaj Kuvendit. Një mungesë respekti që nuk fsheh paaftësinë epike për të lexuar, jo thjesht për të mos bërë punën”, deklaroi Braçe.
Ai insistoi se përgjegjësia direkte për situatën bie mbi Ministrinë e Bujqësisë, Agjencinë Kombëtare të Veterinarisë dhe vetë ministrin Andis Salla, i cili sipas tij po shmang përballjen publike.
“Kjo nuk më bën të harroj se përgjegjëse e drejtpërdrejtë është Ministria e Bujqësisë, Agjencia Kombëtare e Veterinarisë dhe Mbrojtjes së Bimëve dhe ministri i Bujqësisë”, tha Braçe.
Deputeti socialist ngriti tonet edhe ndaj mënyrës se si, sipas tij, po deformohet procedura parlamentare, duke deklaruar se askush nuk mund të vendosë në emër të deputetit se me cilin ministër do të zhvillojë interpelancën.
“Nuk mund të përcaktojë një kryetar grupi se me kë duhet ta bëj unë interpelancën. Nuk mund të përcaktojë një ministër nëse do ta bëjë ai apo një ministër tjetër interpelancën time. Nuk mund ta përcaktojë as zyra e përgatitjes plenare”, deklaroi ai.
Braçe ironizoi edhe administratën parlamentare dhe drejtuesit politikë, duke thënë se problemi kryesor është “përtacia mendore” dhe mungesa e leximit të ligjit.
“Meqë këta nuk e kanë bërë, po e lexoj unë ligjin për të thyer rregullin e përtacisë mendore që ndodh këto kohë”, tha Braçe nga foltorja e Kuvendit.
Pavarësisht mungesës së ministrit Andis Salla, Braçe deklaroi se do ta vijojë interpelancën me ministrin Ervin Demo, vetëm për të kryer detyrën e tij si deputet, ndërsa e bëri të qartë se përgjegjësia politike nuk mund të transferohet.
