Instituti i Shëndetit Publik siguron se nuk ka vend për panik në vendin tonë, lidhur me rastet e Hantavirusit. Autoritetet shëndetësore, në një deklaratë për mediat, thonë se rreziku për Shqipërinë dhe Europën mbetet shumë i ulët, ndërsa nuk ka kufizime për udhëtimet apo tregtinë.
“Risku për Shqipërinë dhe kontinentin është shumë i ulët. Nuk ka asnjë lloj kufizimi të udhëtimeve dhe tregtisë, jo vetëm për shtetasit shqiptarë por edhe për europianët. Vlerësimi bazohet në disa kritere, së pari sepse nisur nga shpërthimi në anijen turistike, lloji i brejtësit që është rezervuar për virusin nuk ekziston në Europë dhe as Shqipëri”, thuhet në deklaratën e ISHP.
Sipas ekspertëve, lloji i Hantavirusit i zbuluar në anije transmetohet në raste shumë të rralla nga njeriu te njeriu.
“Hantaviruset janë një grup i madh virusesh, lloji i zbuluar në anijen turistike transmetohen në raste shumë të rralla ng anjeriu te njeriu, po vetëm në kontakte të ngushta dhe të zgjatura familjare pra duke u kujdesur për një pacient në mënyrë të afërt brenda familjes. Llojet e tjera që qarkullojnë në Europë, Ballkan apo Shqipëri nuk transmetohennga njeriu te njeriu”, sqaron ISHP.
Megjithatë ISHP siguron se janë shtuar monitorimet për raste të dyshuara dhe po shpërndahet gjithashtu informacion për personelin mjekësor, për të iddentifikuar në kohë shenjat dhe simptomat, si dhe izolimin e cdo rasti të mundshëm.
