Kreu i Partisë Demokratike, Sali Berisha, zhvilloi një takim me pensionistët ku prezantoi disa nga prioritetet e programit të tij ekonomik dhe social. Ai deklaroi se synohet vendosja e një minimumi jetik prej 200 dollarësh, i cili sipas tij do të rillogaritet dhe do të përshtatet me realitetin ekonomik. Berisha theksoi se shpërndarja e të ardhurave duhet të garantojë drejtësi sociale dhe ulje të pabarazive ekstreme.
Ai shtoi se në Shqipëri nuk duhet të ketë qytetarë që jetojnë në varfëri ekstreme, duke e përkufizuar atë si mungesë e të paktën 5 eurove në ditë. Sipas tij, mbi këtë bazë duhet të ndërtohet edhe rritja e pensioneve në të ardhmen.
“Ne do vendosim minimum jetik. Është thënë 200 $, do rillogaritet. Se ecën. Po, po do e shpërndajmë. Shpërndarja është drejtësi sociale. Dhe nuk mund të ndërtosh një sistem të tillë të pabarabartë në shkallë ekstreme. Nuk është barazi e madhe ajo. Por shqiptarët që të mbetet në varfëri ekstreme nuk do ketë. Jo, nuk do ketë. Dhe është varfëri ekstreme ai shqiptar që nuk ka 5 euro në ditë. Ai është varfëri ekstreme.
Dhe kjo, mbi këtë bazë do jenë pensionet. Mbi këtë bazë do fillojë rritja e fuqishme e pensioneve. Shqipëria nuk ka asnjë vend më të pasur. Asnjë vend. Në 28.000 km2 nuk ka pasuri të përrallore që ka Shqipëria. Jo. Nuk i ka tokën, detin, nëntokën, çdo gjë. Ujërat dhe çdo gjë tjetër.
Do bëjmë gjithçka që shqiptarët të ndjehen se jetojnë në një vend me pasuri të mëdha dhe të jenë ata që të përfitojnë prej tyre. Ishte qëllim. Jua them këtu. Ishte qëllimi bazuar në këtë, në këtë nocion, në këtë realitet që po them, që shqiptarët ishin më të mirë të paguarit. Dhe arritëm, se arritëm gjë të madhe. Se ato prapë të ulëta ishin. Po, më të mëdha se të tjerëve. Dhe do ta vazhdonim ne atë. Ne do ta vazhdonim me çdo kusht.”
Berisha premtoi gjithashtu ulje të taksës sociale, duke e konsideruar këtë si një mënyrë për të nxitur formalizimin dhe investimet. Sipas tij, shteti duhet të rrisë kontributin për të zgjidhur situatën e pensionistëve dhe për të përmirësuar skemat aktuale. Ai vuri në dukje se një numër i madh pensionistësh, rreth 490 mijë, përfitojnë pensione të pjesshme dhe se nevojiten reforma të thella për ndryshimin e kësaj gjendjeje.
“Në mbledhjen e kontributeve se jo. Ne do ulim taksën sociale. Ne e ulim taksën sociale. Sepse ulja e taksës sociale është një nga rrugët më të sigurta për të ulur informalitetin dhe është një nga rrugët më të sigurta për nxitur prodhimin, investimet me radhë. Por shteti do të bëjë kontributet e veta.
Shteti duhet të këpusë nyjën gordiane. Shteti nuk mund të pranojë kurrë këtë, këtë situatë dramatike. 490 mijë pensionistë janë me pensione të pjesshme. Lëre pastaj që në skemat burokratike, kjo është e vërtetë, normalisht, në qoftë se do ishe një ecuri normale në një sistem, po ne kemi kapërcyer sisteme.
Është e domosdoshme të bëhen zgjidhje që të kenë parasysh se të kalosh nga sistemi socialist në sistemin e tregut, që është sistemi i mrekullisë ekonomike, nuk ka dyshim, por nga ana tjetër është dhe sistemi i çmimeve që i kontrollon tregu.”
