Një ngjarje e rëndë është regjistruar pasditen e së shtunës në Tiranë, në zonën e Oxhakut, ku një 47-vjeçar është gjetur pa shenja jete brenda automjetit të tij. Burime për mediat bëjnë me dije se viktima është taksisti Uljan Kolgjegja, i cili dyshohet të ketë pësuar një atak kardiak teksa ndodhej në timon pasditen e 2 majit.
Sipas të njëjtave burime, pak para ngjarjes ai kishte qenë në gjendje të mirë shëndetësore dhe po vijonte normalisht aktivitetin e tij të përditshëm. Mësohet se Kolgjegja kishte transportuar një klient drejt Spitalit Pediatrik dhe gjatë kthimit, pasi kishte ndaluar pranë zonës së Oxhakut, dyshohet se ka pësuar një infarkt fatal.
Lajmi për ndarjen e parakohshme nga jeta ka tronditur familjarët, miqtë dhe të njohurit e tij, të cilët e përshkruajnë si një njeri të respektuar dhe të dashur.
Ndërkohë, Kolgjegja nuk ishte një emër i panjohur për publikun. Në vitin 2020, ai ishte përfshirë në një incident para Kryeministrisë, ku tentoi të vetëdigjej me benzinë pasi i ishte hequr patenta nga policia për shkelje rrugore. Po ashtu, ai ishte bërë i njohur edhe për deklaratat publike lidhur me personazhet e njohur, përfshirë Sali Berishën, si dhe për “mbretin” e lojërave të fatit, Ervis Martinajt.
Në një intervistë të dhënë më herët, Kolgjegja kishte folur hapur për raportin e tij me familjen Martinaj. Ai shprehej se kishte një lidhje të fortë emocionale me Ervis dhe Brilant Martinajn, duke i konsideruar ata si njerëz shumë të afërt, madje kishte bërë dhe tatuash për Visin.
“Brilantin e kam pasur si vëllanë e vogël. Visin e kam mbretin tim. Pa Visin nuk kam frymë. Atë ditë që do vdesë Visi, atë ditë do jem edhe unë në botën tjetër. Kam parandjenjë që Visi do jetë mirë. Brilantin e kam vëlla të vogël. Sa kam mbushur 18 vjeç e kam çuar me taksi në Europë, në Amsterdam. Atë që i kanë bërë për Brilantin…Zoti vonon por nuk harron. E takoja shpesh. Herën e fundit folëm për punët tona, nuk thuhen ato gjëra. Gjëra çunat. Ka pasur shumë qejf muzikën, ndiqte muzikën.
Mbaronte pas Stresit. Ishte i muzikës. Vëllai im. Për Visin, pa atë nuk kam frymë. Nuk vendos as familjen time para tij. Ta dijnë mirë. Është parandjenja ime që nuk e ka gjetur gjë. Komunikoj javë për javë. Iki tek Brilanti, shkoj edhe tek ata. Mediat nxjerrin gjëra, kuptoje vetë si janë bërë. Unë u jap kurajo. Unë Visin e kam bërë tatu tek dora para 2 viteve. Brilanti thoshte ma bëj edhe mua tatuazh. Këmbëngultë gjithmonë, edhe ka qenë prezent edhe Stresi. Do e bëj portret Brilantin. Unë nuk e kam bërë për klientët këtë gjë.
Nuk flasin për fotot që kam vendosur unë. Ata që i kanë prerë ëndrrën e Brilantit kanë bërë shumë gabim. Zoti vonon por nuk harron, për ata të tre e kam. Do marrin dënimin që meritojnë. Dënimin e marrin nga shteti. E vendos ligji. Normale që e vendos ligji. Luani ecën vetë. Është mbreti im, Visi. Nuk preket Visi, le ta harrojnë të gjithë”, thoshte ai aso kohe.
