Gjergj Neli, avokat dhe i afërm i Kreshnik Mujecit, i cili së bashku me bashkëshorten e tij, Gentjanën, mbeti viktimë e një atentati të rëndë në Balldren të Lezhës, ka reaguar në lidhje me ngjarjen.
Në një postim në Facebook, Neli shkruan se vrasja nuk ka lidhje me pretendimet e ngritura në media për hakmarrje, pasi sipas tij Kreshnik Mujeci është shpallur i pafajshëm nga drejtësia.
“Në përfundim të këtyre proceseve, shtetasi Kreshnik Mujeci nuk është gjetur fajtor në lidhje me atë ngjarje. Për rrjedhojë, çdo përpjekje për ta lidhur ngjarjen e sotme me pretendime të tilla është e papranueshme dhe cenon të vërtetën, si dhe rëndon padrejtësisht mbi familjen e viktimave”, shkruan avokati.
Po ashtu, Neli i ka bërë thirrje drejtësisë që të zbardhë këtë krim makabër.
Reagimi i plotë i avokatit Gjergj Neli:
Deklaratë publike
Për ngjarjen e rëndë dhe makabre të atentatit ndaj Kreshnik Mujecit dhe familjes së tij
Me mallëngjim dhe keqardhje morëm vesh lajmin e hidhur për atentatin e ndodhur sot në fshatin Balldren, Njësia Administrative Balldren, Bashkia Lezhë, ku humbën jetën tragjikisht shtetasit Kreshnik Mujeci dhe Gentjana Mujeci. Për këtë akt makabër shprehim dhimbjen e thellë dhe solidaritetin me familjarët e viktimave në këtë moment të vështirë.
Dënojmë me forcë këtë akt të rëndë kriminal dhe kërkojmë nga organet ligjzbatuese zbardhjen e plotë dhe të shpejtë të ngjarjes, si dhe vënien përpara përgjegjësisë të autorëve.
Njëkohësisht, dënojmë publikisht deklarimet e disa mediave, të cilat kanë aluduar se kjo ngjarje lidhet me motive hakmarrjeje. Theksojmë se familja Mujeci nuk ka asnjë detyrim gjaku. Edhe pse kjo mund të jetë një nga pistat e hetimit për organet ligjzbatuese, kërkojmë që të mos lihen pas dore edhe pista të tjera të mundshme.
Kreshnik Mujeci ka qenë një familjar i rregullt, i dashur dhe i respektuar nga të afërmit dhe komuniteti në zonën e Lezhës dhe Shkodrës. Ai merrej me blegtori, së bashku me bashkëshorten e ndjerë, për të siguruar jetesën e familjes.
Pretendimet për përfshirjen e tij në ngjarjen e vitit 2017 në Malin e Jushit janë të pavërteta dhe të pabazuara. Kjo çështje është trajtuar dhe përfunduar nga organet kompetente, përkatësisht Prokuroria e Shkodrës, si dhe nga Gjykata e Shkallës së Parë dhe Gjykata e Apelit Shkodër.
Në përfundim të këtyre proceseve, shtetasi Kreshnik Mujeci nuk është gjetur fajtor në lidhje me atë ngjarje. Për rrjedhojë, çdo përpjekje për ta lidhur ngjarjen e sotme me pretendime të tilla është e papranueshme dhe cenon të vërtetën, duke rënduar padrejtësisht mbi familjen e viktimave.
U bëjmë thirrje mediave të tregojnë përgjegjësi profesionale, të verifikojnë informacionin dhe të shmangin përhapjen e lajmeve të pasakta, që mund të ndikojnë negativisht në opinionin publik dhe në dinjitetin e familjeve që supozohet të jenë të përfshira në konflikt.
Kërkojmë drejtësi, zbardhjen e plotë të ngjarjes dhe transparencë të plotë për këtë krim të rëndë.
Zoti i forcoftë familjarët dhe miqtë kudo që janë.
Lamtumirë, kushëriri im!
Lamtumirë, kunata ime!
Pushofshi në paqen e Zotit!
