Teksa hyn në qytetin perëndimor të Meksikës, Guadalajara, gjurmët e sulmit të tmerrshëm të kartelit të dielën janë ende të dukshme, raporton media britanike BBC.
Mbetjet e makinave të djegura ndodhen anash rrugëve, ndërsa në autostrada shihen njolla të nxira të asfaltit, pasi karteli Jalisco New Generation, një nga kartelet më të rrezikshme në vend, ua vuri flakën dhjetëra automjeteve, si hakmarrje ndaj vrasjes së shefit të tyre, bosit të drogës “El Mencho”.
Më tej, BBC shkruan se kjo, së bashku me pamjet e bizneseve të plaçkitura apo të përfshira nga flakët, përcolli mesazhin që ky kartel i El Mencho synonte: se, me apo pa liderin e tyre, ata mbetën të fuqishëm për të futur vendin në kaos dhe për të përhapur frikë në të gjithë Meksikën.
Presidentja e Meksikës, Claudia Sheinbaum, është përpjekur vazhdimisht ta kundërshtojë këtë narrativë. Në konferencën e saj më të fundit për media, ajo foli për rikthim të rendit dhe sigurisë publike në pjesën më të madhe të vendit, duke vlerësuar reagimin e autoriteteve. Megjithatë, rreziku është i pranishëm.
Ndërkohë, një numër i madh ushtarësh dhe policësh po patrullojnë ende nëpër Guadalajara dhe jo vetëm. Qëllimi është të transmetojnë njëfarë qetësie tek qytetarët, por për shumë banorë, prania e tyre nëpër rrugë dhe qytete vetëm sa e ka shtuar pasigurinë.
Sipas BBC, kjo shihet tek rrugët e zbrazëta; njerëzit i frikësohen një shpërthimi tjetër të dhunës.
Një pjesë e konsiderueshme e bizneseve janë të mbyllura, shumë shkolla kanë pezulluar mësimin. Punëtorët kanë vendosur të qëndrojnë në shtëpi për të shmangur një situatë kërcënuese për ata dhe familjet e tyre.