Dy prona të Peter Mandelson janë kontrolluar nga policia britanike, në kuadër të hetimeve mbi pretendime për shkelje të detyrës publike.
Mandelson, 72 vjeç, ish-zyrtar i lartë qeveritar, është përfshirë në një skandal pas publikimit të dosjeve të Jeffrey Epstein, që zbulojnë detaje të reja mbi marrëdhënien e tyre.
Zëvendëskomisionerja e Policisë Metropolitane, Hayley Sewart, tha se kontrollet janë kryer nga “ekipi i specializuar për krimet qendrore”.
“Në kuadër të këtij hetimi po shqyrtohen shkelje të detyrës publike”, deklaroi ajo. “Ai nuk është arrestuar dhe hetimet vijojnë.”
Kjo bastisje vjen pas detajeve të reja që tregojnë se ish-ministri britanik ka ndarë informacion të ndjeshëm me Epstein pas krizës financiare të vitit 2008. Mandelson ka mohuar çdo akuzë lidhur me dosjen dhe ka shprehur keqardhje për mbajtjen e marrëdhënies me Epstein, duke u kërkuar falje viktimave të pedofilit.
Dokumentet e qeverisë dhe presioni mbi Starmer
Hetimi ka vënë gjithashtu kryetarin e Partisë Laburiste e njëkohësisht kryeministrin, Keir Starmer, nën presion të madh për të publikuar dokumentet që lidhen me vlerësimin e Mandelson për të marrë detyrën e ambasadorit britanik në SHBA, post për të cilin u shkarkua në shtator.
Kryeministri tha se Mandelson kishte gënjyer për miqësinë e tij me Epstein para se të merrte detyrën prestigjioze në Washington.
Në një letër drejtuar kryetarit të Komitetit të Inteligjencës dhe Sigurisë (ISC) të parlamentit, Starmer njoftoi se dëshiron që dokumentet të publikohen sa më shpejt të jetë e mundur, megjithëse një “sasi e konsiderueshme materiali” duhet të shqyrtohet më parë për të mos rrezikuar sigurinë kombëtare të Mbretërisë së Bashkuar dhe marrëdhëniet ndërkombëtare.
Zyrtarët qeveritarë po punojnë me policinë për të siguruar që publikimi i dokumenteve të mos ndikojë në hetimin ndaj Mandelson. Nga sa mësohet, dokumentet janë në faza të hershme të shqyrtimit dhe përfshijnë mijëra faqe.