Izraeli ka qenë i përfshirë edhe më herët në eliminimin e shkencëtarëve iranianë, por zakonisht pa e pranuar publikisht përgjegjësinë. Megjithatë, në qershor, sipas një hetimi të ri, roli i tij doli hapur, ndërsa Tel Avivi u shfaq më i vendosur në veprimet kundër aleatëve të Iranit në Rripin e Gazës, Liban dhe Siri.
Një raport investigativ i “Washington Post”, i realizuar në bashkëpunim me emisionin “Frontline” të PBS-së, ka zbuluar detaje të reja mbi sulmet izraelite ndaj shkencëtarëve bërthamorë iranianë gjatë verës, mënyrën se si u planifikuan ato dhe pasojat që patën në Iran.
Raporti bazohet në intervista me disa zyrtarë aktualë dhe ish-zyrtarë izraelitë, iranianë, arabë dhe amerikanë. Disa prej tyre kanë folur për herë të parë për mediat, në kushte anonimiteti, duke përshkruar operacione sekrete dhe vlerësime të brendshme.
Sipas zyrtarëve nga Izraeli, Shtetet e Bashkuara dhe Agjencia Ndërkombëtare e Energjisë Atomike (IAEA), programi bërthamor i Iranit ka të ngjarë të jetë vonuar me disa vite. Megjithatë, kjo bie ndesh me deklaratat e presidentit amerikan Donald Trump, i cili ka pretenduar se programi ishte “shkatërruar plotësisht”.
Nga ana e tij, Irani vijon të mohojë se po zhvillon armë bërthamore, duke këmbëngulur se aktivitetet e tij kanë qëllime civile dhe lidhen vetëm me prodhimin e energjisë bërthamore.