Deputeti i Partisë Demokratike, Luan Baçi, i ftuar në emisionin “Tema e Ditës” në moderimin e Arbër Hitajt, sqaroi qëndrimin e PD-së lidhur me kandidaturat për Avokat të Popullit dhe situatën brenda opozitës.
Baçi theksoi se Endri Shabani nuk është kandidati i PD-së për Avokat të Popullit, duke shpjeguar se firmat e deputetëve ishin vetëm procedurale.
“Opozita, duke qenë në një situatë të tillë, sidomos pas zgjedhjeve të bashkisë së Tiranës ku u propozua një kandidat nga shoqëria civile, vendosi të mbështeste të gjitha propozimet e ardhura nga grupimet opozitare. Firmat u dhanë vetëm për t’i paraqitur kandidaturat te komisioni, si një hap formal. U firmosën rreth 20 kandidatë për avokat që kërkuan mbështetje dhe ne i kemi firmosur,” u shpreh Baçi.
Ai shtoi se këto firma nuk përbëjnë mbështetje politike, por një procedurë për të garantuar përfaqësim të opozitës në fazën e parë të filtrimit.
“Firmat janë tërhequr dhe kjo është ligjore. Të gjitha kandidaturat që do të shkojnë në Kuvend janë të pafirmosura. Grupi parlamentar i PD-së, nëse i lihet opozitës e drejta për kandidaturën, do të mblidhet dhe do të zgjedhë vetëm një emër për ta çuar në Kuvend,” deklaroi ai.
Baçi: Takimi i Salianjit ishte gabim organizativ, jo lëvizje politike
Deputeti u ndal edhe te takimi i fundit i Ervin Salianjit, duke e konsideruar një gabim procedural, por jo një lëvizje brenda partisë.
“Jam plotësisht dakord që çdo deputet dhe çdo anëtar kryesie duhet të dalë në bazë, të bëjë takime dhe të diskutojë me strukturat. Por Partia Demokratike është një parti e organizuar, me statut dhe udhëzime të qarta. E vetmja problematikë që pashë te zoti Salianji është se duhej ta njoftonte kryesinë dhe strukturat qendrore për takimin, që të koordinohej me degën përkatëse. Nuk është lëvizje, absolutisht,” theksoi Baçi.