Tajlanda dhe Kamboxhia janë përfshirë sërish në luftime të ashpra përgjatë kufirit të tyre të diskutueshëm, duke rrezikuar prishjen e paqes së brishtë në rajon.
Autoritetet tajlandeze njoftuan se të martën kanë ndërmarrë operacione ushtarake për të dëbuar forcat kamboxhiane të zbuluara brenda territorit të tyre në provincën bregdetare Trat. Marina tajlandeze akuzoi Kamboxhian për vendosjen e snajperëve, armëve të rënda dhe hapjen e llogoreve, duke e cilësuar këtë si një kërcënim serioz ndaj sovranitetit të vendit.
Nga ana tjetër, Ministria e Mbrojtjes së Kamboxhias raportoi se dy civilë humbën jetën gjatë natës, duke e çuar numrin e viktimave në gjashtë. Tajlanda konfirmoi vdekjen e një ushtari dhe plagosjen e 18 të tjerëve, ndërsa Kamboxhia njoftoi për nëntë civilë të lënduar.
Kryeministri kamboxhian Hun Manet paralajmëroi se Tajlanda “nuk duhet të përdorë forcën ushtarake për të sulmuar fshatra civile nën pretekstin e rikthimit të sovranitetit”.
Mijëra banorë e kaluan natën në strehimore në zonën kufitare të Siem Reap në Kamboxhia, të zhvendosur nga përplasjet e fundit dhe pa siguri se kur do të mund të kthehen në shtëpitë e tyre.
Ndërkohë, komunitetet në anën tajlandeze të kufirit jetojnë nën frikën e vazhdueshme të evakuimeve të përsëritura, që kanë ndërprerë jetën e përditshme, mbyllur shkolla e spitale dhe dëmtuar aktivitetet ekonomike.
Banorët shprehen se i dëgjojnë qartë të shtënat pranë fshatrave të tyre dhe ndihen të pafuqishëm përballë situatës, duke e cilësuar këtë gjendje si një vuajtje të vërtetë që po prek mënyrën e tyre të jetesës.
Siç shkruan Reuters, përplasjet e fundit janë më të ashpra që nga korriku, kur një shkëmbim pesë-ditor raketash dhe artilerie të rëndë la pas 48 të vrarë dhe mbi 300 mijë të zhvendosur, përpara se presidenti amerikan Donald Trump të ndërhynte për të ndërmjetësuar një armëpushim.
Të dy vendet kanë një histori të gjatë mosmarrëveshjesh mbi kufirin tokësor prej 817 kilometrash, ku shpeshherë mosmarrëveshjet për tempuj të lashtë kanë nxitur ndjenja nacionaliste dhe përplasje të armatosura.
Tensionet u rritën ndjeshëm në maj, pas vrasjes së një ushtari kamboxhian, duke çuar në grumbullim trupash dhe përshkallëzim të krizës diplomatike.