Dy persona kanë rënë në prangat e Policisë së Tiranës me akuzën e një serie vjedhjesh të automjeteve. Sipas njoftimin të policisë në operacionin e koduar “The thief”, u arrestuan një 34-vjeçar i dyshuar si autor i vjedhjeve të përsëritura dhe një 48-vjeçar, i cili blinte prej tij materialet e vjedhura.
“Shërbimet e Komisariatit të Policisë Nr. 2, pas denoncimeve nga disa drejtues automjetesh/subjekte, për vjedhjen e materialeve dhe sendeve të një vlere të konsiderueshme nga automjetet e tyre apo subjekte, pas thyerjes së xhamave, bazuar dhe në informacionet e marrë në rrugë operative, organizuan dhe finalizuan operacionin policor të koduar “The thief”. Në kuadër të operacionit, u kapën dhe u arrestuan shtetasit G. Z., 34 vjeç, banues në Tiranë dhe G. C., 48 vjeç, banues në Tiranë”, njofton policia, shkruan A2 CNN.
Sipas hetimeve paraprake, 34-vjeçari dyshohet se në korrik, tetor dhe nëntor ka thyer xhamat e 5 automjeteve dhe të një subjekti, duke vjedhur materiale dhe sende me vlerë, të cilat më pas ia shiste 48-vjeçarit. Gjithashtu, ai dyshohet se më 20 dhe 29 nëntor 2025 ka vjedhur edhe dy biçikleta.
Gjatë kontrollit në banesën e 48-vjeçarit, Policia sekuestroi një sasi materialesh të vjedhura, ndërkohë që hetimet vijojnë për të zbardhur raste të tjera ku mund të jetë i përfshirë autori kryesor.
Materialet i janë referuar Prokurorisë për veprime të mëtejshme procedurale.