Mbështetësit e ish-liderit të vendit, Bashar al-Assad, po komplotojnë për të rrëzuar qeverinë e Ahmed al-Sarrah në Siri duke kanalizuar miliona dollarë për mijëra luftëtarë për të filluar kryengritjet, sipas një hetimi të Reuters.
Plani, i zbuluar nëpërmjet intervistave me 48 persona dhe dokumenteve financiare të shqyrtuara nga Reuters, vjen ndërsa Siria shënon një vit që nga rënia e Assadit dhe qeveria e re nën Presidentin Ahmed al-Sarrah fiton legjitimitet ndërkombëtar.
Dy burra që dikur ishin ndihmësit më të ngushtë të Assadit – Gjeneral Major Kamal Hassan, ish-kreu i inteligjencës ushtarake, dhe kushëriri i tij miliarder Rami Makhlouf – po përpiqen nga mërgimi në Moskë të krijojnë milicitë midis pakicës alavite të Sirisë, grupit fetar të lidhur prej kohësh me familjen Assad, sipas gjetjeve të Reuters.
Një nga rreziqet më të mëdha në konfliktin midis tyre është një rrjet prej 14 strehimesh dhe deposh nëntokësore në zonat bregdetare, të cilat thuhet se përmbajnë armë, municione, sisteme komunikimi dhe pajisje mbijetese. Tre zyrtarë të lartë – dy oficerë ushtarakë dhe një guvernator rajonal – konfirmuan ekzistencën e tyre për Reuters, duke thënë se ato mbeten operacionale, megjithëse të dobësuara.
Për t’iu kundërvënë komploteve, qeveria e re e Al-Sarra-s ka “punësuar” një mik të vjetër të ngushtë të familjes së Assadit: Khaled al-Ahmad. Al-Ahmad, dikur një komandant i lartë paraushtarak i Assadit, i cili më vonë u kthye kundër tij, po përpiqet t’i bindë alavitët se siguria e tyre mund të garantohet vetëm nën qeverinë e Al-Sarra-s dhe jo nga kuadrot e regjimit të vjetër jashtë vendit.