Deputeti i Partisë Demokratike, Tritan Shehu e ka cilësuar lëvizjen e Ervin Salianjit brenda kësaj force politike si një lëvizje personale dhe që nuk ka lidhje me vetë PD-në.
Duke folur në emisionin “Tema e Ditës” të Arbër Hitajt, deputeti Shehu tha se Ervin Salianji ka ndërmarrë nja lëvizje sipas axhendës së tij personale dhe gjithsekush sipas tij, është i lirë të ndërmarrë lëvizje të tilla.
“Unë e kam parë personalisht si një axhendë personale dhe nuk e kam për zakon të komentoj veprimet personale të gjithsekujt. E di vetë ai pse e ka ndërmarrë këtë lëvizje. E kam parë në këtë mënyrë si një axhendë personale të një apo dy, apo tre personave për të cilët unë nuk kam asnjë koment sepse në një vend demokratik sepse gjithsekush është i lirë të ndërmarrë axhenda personale, veprime personale dhe unë nuk kam dëshirë të komentoj dhe as e kam për zakon të komentoj hapat personale të që ndërmerr gjithsekush”, tha Shehu.
Ai vuri në dukje se kjo lëvizje ndodh jashtë strukturës dhe forumeve të Partisë Demokratike dhe si e tillë sipas Shehut, ajo mbetet krejtësisht personale.
“Unë e shoh si një axhendë që është jashtë Partisë Demokratike, jashtë strukturës dhe forumeve të Partisë Demokratike si një axhendë personale që për arsye nga më të ndryshmet mund t’i ndërmarrin një në vend demokratik. Kjo është çështja, dhe evitoj çdo koment për një hap të tillë sepse e shoh si një hap personal dhe më pas e gjykon vetë ai hapat e tij dhe elementët e brendshëm të tij”, u shpreh më tej Tritan Shehu.